Ang pagbukal sa politika dayag na kaayo nga mamatikdan sa mga molupyo sa kabarangayan isip kabahin kini sa pangandam alang sa lokal 2013 election o mahimo usab nga pangandam sa 2013 barangay election kun dili man gayod matigayon ang tinguha nga pag-oktaba sa atong mga magbabalaod. Daghan unta ang mipagakpak nga mga barangay opisyal dihang gipadayag ni Senate President Juan Ponce Enrile ang labot sa pag-uswag sa barangay election sa 2016.
Sa pagpagakpak sa pipila ka mga naglingkod nga barangay opisyal daw mikisdom usab ang pipila ka mga molupyo sa barangay nga nagtinguha sa pag-ilis sa ilang mga barangay opisyal nga ilang namatikdan nga dili na epektibo sa gihuptan niining katungdanan.
Matud pa nila nga molungtad pa og laing tulo ka tuig ang ilang pag-antos sa ilang mga barangay opisyal nga nalinga na usab sa mga gimbuhaton ug kanunay na lamang mataligam-an ang pagtuman sa iyang mga kaakohan isip barangay opisyal,
Kun mikisdom man ang mga panagway sa pipila ka mga molupyo sa barangay sa tinguha nga pag-uswag sa barangay election labaw pa nga mikisdom ang panagway niadtong mga molupyo nga nagtinguha sa pagsalmot sa politika sa sunod tuig nga barangay election.
Giangkon nila nga taas na kaayong katuigan ilang pagpaabot alang sa pagpahigayon og barangay election kun hingpit nga kahatagan og katumanan ang tinguha ni Senador Enrile.
Gitataw nila nga ang maong gidugayon nga mga tuig sa paglingkod sa katungdanan sa atong mga barangay opisyal dako kaayo ang kahigayonan nga hingpit nga mapawong ang ilang kadasig nga mapili nga barangay opisyal.
Hinuon bisan sa mga gikataho sa tinguha sa barangay election atong mamatikdan nga wala gihapon mohunong ang kisaw sa barangay ug ilang gipadayag nga labing maayo nga padayonon ang pagpaduol sa katawhan ngadto sa kabarangayan isip panagana daan nga mahinayon kini ug dili gayod kapugngan ang tinguha nga pag-oktaba niini.