Nagkalainlain ang baruganan sa mga politiko ug katawhan kalabut sa flyover project sa Cebu City. Ang Bando Osmeña - Pundok Kauswagan (BOPK) dakung uyon niini apan gisupak kini ni Mayor Mike Rama ug sa kadaghanang negosyante.
Gawas niadtong kontrobersiyal nga mga flyover sa eskina sa mga dalan M.J. Cuenco ug Gorordo ug sa eskina sa mga dalan Gorordo ug Archbishop Reyes nga gipugngan ang katukuran, laing duha ka mga flyover project ang gipresentar sa Department of Public Works and Highways (DPWH) nga tukuron sa eskina sa mga dalan Archbishop Rosales - Juan Luna ug lain sa eskina M.J. Cuenco ug Juan Luna.
Nabaraw kini kay wala man makatuman sa mga rekisitos ang maong proyekto labi na sa pagduso unta niini sa Cebu City Development Council. Sama kini sa gidangatan sa expansion sa Mactan - Cebu International Airport (MCIA) sa Lapu-Lapu City nga wala pa usab maindorso sa development council sa maong siyudad.
Sayop ang pagduda nga dili uyon ang Regional Development Council (RDC) sa flyover. Ang tinood, wala kini aprobahi sa Infrastructure Develoment Committee (IDC) sa RDC kay wala kini maduso sa local development council. Unya na nato masayri kun unsay baruganan sa mga sakop sa RDC kun makompleto na ang mga rekisitos niini ug mahisgutan na sa IDC ang maong mga proyekto.
* * *
Mitambong ako sa 4th national convention sa private sector representatives sa RDC nga gipahigayon didto sa 33,653 ka ektaryang Clark Freeport Zone, Pampanga niadtong Hunyo 20 ngadto sa 22. Ang host mao ang RDC Region III.
Didto kami motugpa sa Diosdado Macapagal International Airport (DMIA) nga mao ang kanhi US airbase. Dili man hinoon kini ingon kaanindot sa Mactan Cebu International Airport (MCIA) apan aduna silay modernong air facilities nga gibiyaan sa mga Amerikano ug mas daghan ang ilang mga budget airlines nga mobiyahe sa Hongkong, Macau, ug ubang mga dapit sa Asya.
Gisuroy kami sa ubang mga dapit sa Region III sama sa Subic bay diin mihimo kami og safari diin ang mga tigre miduol ug misampig sa kilid sa among gisakyang improvised jeep samtang gilawgan og karne nga manok sa among guide. Sa dihang nahurot na ang pagkaon miambak ang dako kaayong tigre sa atop sa among gisakyan.
Sa Bataan, gisuroy kami sa ilang tourist attraction sama sa Mt. Samat nga maoy monumento sa naila na kaayong "Death March" sa miampo nga mga sundawong Pilipino nga gipaantus sa mga Hapon. Gilibot usab kami sa hapit na mahuman nga GEN power plant nga mosuplay og 600 megawatts sa Luzon. Magsugod kini pag-operate sa Enero 2013.
Ang kanunay namong agian mao ang Subic-Clark-Tarlac Expressway (SCTEX) nga may gilay-ong 93.77 kilometros gikan sa Clark ngadto sa Subic nga biyahion lamang og 40 minutos. Ang maong SCTEX mitabas og daghang dagkung mga bukid aron mahimong tul-id ang maong expressway.
* * *
Na-intriga ako sa pamahayag ni Emilio "Mimo" Osmeña III, anak ni kanhi gobernador Lito Osmeña, nga mahimong modagan siya sa pagka-senador ug kaha pagka-mayor sa Cebu City kun adunay emergency nga makapapugos kaniya pagdagan. Unsa may gipasabut niya sa emergency? Nagkalainlain ang pagsabot sa mga Sugbuanon niining maong pamahayag ni Mimo.
* * *
Nasayop ko sa akong pangagpas nga si Bise Gobernador Agnes Magpale maoy molansar sa pagka-gobernador ubos sa alyansa sa Liberal Party (LP) ug Barug alang sa Kauswagan ug Demokrasya (Bakud) . Duna na man gud kunoy bindisyon gikan kang LP President Mar Roxas ug ni Pres. Noynoy Aquino ang Davide - Magpale tandem.
Ang gihuwat sa taga-Cebu City mao ang kandidato sa pagka-mayor nga sagupon sa Liberal Party dinhi. Si Mayor Mike Rama ba o si Kong. Tomas Osmeña?
Kun tumanon sa partido ang equity of the incumbent rule si Mayor Mike ang mahimong standard bearer. Ang alas lamang ni Kong. Tomas mao ang iyang kasuod kang LP president Roxas.
* * *
Email: msr1144@yahoo.com