Human na ang Pasko 2011 ug layo pa ang Pasko 2012 pero diha toy upat ka batan-ong lalaki nga nanaygon tungang gabii sa usa ka village kon subdivision sa South District ning siyudad dili pa lang dugay.
* * *
Medyo naka-inom ang upat. Wala tagda sa mga namuyo sa panimalay nga gipanaygonan. Busa human sa duha ka kantang Paskohanon, nanglakaw ang upat ka batan-ong lalaki.
* * *
Apan namalik kini. Wa na manganta. Ang gibuhat mao ang paglabay og mga itlog bugok sa balay nga ilang gipanaygonan diin wa sila tagda.
* * *
Nahibulong ang atong tinubdan niining istoryaha kun diin nila kuhaa kadtong mga bugok nga itlog sa manok sa maong oras sa kagabhion.
* * *
Nanglupad ang mga itlog ug ang uban namuto -- pok, pok, pok -- ineg-igo sa bongbong sa bay.
* * *
Ang nakaporke lang kay nasayop ang mga attacker sa ilang target. Ang tapad nga apartment maoy ilang gitirahan. Polis ra ba ang tag-iya sa maong nasaypang apartment. Nanaug si Sir ug gigukod ang upat ka mananaygon. Tapus.
* * *
TRIVIA-- Maayong buntag sa atong mga higala diha sa Ponce Compound, North Reclamation Area; ug diha sab sa Carbon Market. Daghang salamat sa inyong suporta sa atong Banat News.