Tuig 2007-2009 nahimo akong coadjutor ni Msgr. Sindulfo Iriarte sa Yati, Lilo-an. Sa tinuod lang, dali ko kaubsan sa pailob. Buot nako ang hinanaling resulta. Mora ba og gikuwenta na ang tanan. Apan ang amahanong maymay ni Tatay Sin, “In God’s Time” kanunay’ng mosibaw sa akong alimpatakan.
Matag misyonerong lihok, lihok sa Dios ug gihimong Instrumento lamang ang tawo. Busa wala’y katarungan nga ang tawo mopunting lamang sa iyang kaugalingong katakus. Busa, himoa kutob sa imong mahimo ang pagsangyaw sa maayong balita apan himoa kini ubos sa lamdag sa Diosnong panahon.