Cantabaco, Toledo — Nagpadayon ang konstruksyon sa nag-inusarang parokya ni Beato Pedro Calungsod sa Archdiocese of Cebu. Mas gipanindot ang altar ug gibutangan na og kabilya nga ali ang palibot sa simbahan. Dako pa ang kuwang sa maong proyekto nga gikinahanglan nga mahuman na sa di’ pa ang buwan sa Oktubre kung kanus-a ipahigayon ang canonization o ang hingpit nga pagdeklarar ni Calungsod nga usa ka santo. Buot sa bag-ong parokya nga presentable na ang ilang simbahan alang sa mga deboto nga gidagsang moabot dinhi aron sa pag-ampo ug pagpangayo og tabang sa bag-ong Bisayang santo.
Apan kun sa miaging buwan, pulos problema sa pundo ang gipadayag sa ilang kura paroko nga si Fr. Russel Sungcad, di’ na karon. Iyang gibutyag, daghang tabang ang niabot sa ilang parokya dihang nagsugod ang media sa pagtuki sa ilang simbahan ug mga kahibulongan nga sugilanon kabahin sa ilang parokya. Giklaro sa kura paroko, ila lang gisalig ang konstruksyon sa simbahan sa kahitas-an ubos sa pangaliya ni Beato Calungsod. Human sa sunod-sunod nga media exposure sa telebisyon, radyo ug mantalaan, karon ang tabang na ang niduol sa pari. Ang semento ug ba’s nga gigamit sa konstruksyon gihatag sa usa ka tawo. Aduna say naghatag og salapi aron magamit sa ubang galastohan sama sa sweldo sa mga trabahante.
Gawas sa grasyang materyal, nagsunod-sunod ang pagduaw sa mga deboto ni Calungsod sa bukirang barangay sa Cantabaco. Bitbit ang ilang intensyon nga matambalan sila sa ilang gihambin nga sakit, ila ning gidangop sa kandidatong santong Pinoy. Gibutyag ni Fr. Sungcad adunay uban nga nag-antos sa sakit nga cancer nga gikan pa sa Estados Unidos ug human makaduaw sa simbahan nangangkon nga nigaan ang pamati. Adunay uban nga nibutyag nga namilagrohan sila tungod kay mahimo na silang di’ moinom sa daghang tambal. Ang matag testimoniya sa pagka-ayo sa mga sakit giisip nga dakong milagro sa matag adlaw ubos sa usa ka yano ug gamay nga parokya ni Calungsod.
Ang dakong tahas nga nagpaabot mao ang pag-andam ning maong simbahan sa pagdagsa unya sa libuan ka mga deboto gikan sa bisan asang bahin sa nasud ug kalibutan. Sugod sa buwan sa Oktubre, gipanlantaw ang pag-abot sa mga deboto labi na kadtong di’ makaduaw sa Roma alang sa canonization ug mga tawo nga di’ masibo sa Calungsod shrine sa Archbishop’s compound sa dakbayan sa Sugbo. Human sa canonization, ma-usab na unya ang panga’n sa parokya gikan sa Beato Calungsod ngadto na sa Santo Pedro Calungsod parish. Ug uban sa kausaban, malaumon ang mga taga Cantabaco nga aduna say kausaban nga mahitabo sa kinabuhi sa mga tawo nga moduaw sa maong dapit ug sa mga deboto sa bag-ong Pilipino nga santo.
Apan makahugno ang pamahayag ni Arsobispo Osvaldo Padilla, ang Pinoy nga Papal Nuncio sa South Korea. Iyang gibutyag nga sa maong nasud, adunay 103 ka mga santos ug adunay 124 ka mga kandidato sa pagka-santo. Dili katolikong nasud ang South Korea apan dakong grasya nga adunay gatusan ka mga santos sa maong dapit. Itandi dinhi sa Pilipinas kung diin halos 90 porsiento sa atong populasyon Katoliko, mag-duha ka santos pa lang nga Pinoy ang gideklarar sa Vatican. Si Archbishop Padilla nitataw nga dakong hagit sa mga Pilipino ang pagtan-aw sa atong pagtuo ug gi-unsa ni paggamit aron nga mas mahatagan og balaang disposisyon ang matag buhat. Ang dakong hagit mao ang pag-diskobre sa mas daghan pang balaang tawo nga maghimong inspirasyon.
Ang debosyon ngadto ni Calungsod ang labing dakong hagit karon sa mga Pilipino. Lisud ang pagbalaan sa usa ka tawo ug lisud ang mga paningkamot aron makonsiderar siyang usa ka santos. Apan di’ lang sa deklarasyon sa Vatican matapos ang tanan tungod kay human sa canonization, nagpaabot ang mas dakong hagit unsaon nga mas maila si Calungsod nga usa ka migrante, batan-ong katekista ug martir. Di’ lang sa mga taga Cantabaco sa Toledo angayan nga ilhon ang iyang pagka-santo ug labaw nga di’ lang kutob sa Sugbo ug sa nasud apan sa tibuok kalibutan.
Email: rico_lucena@abs-cbn.com. or ricolucena@yahoo.com.