Ang pag-ampo ingon nga tambal
Nahimong kabahin sa kinabuhi ug ministeryo ni Jesus mao ang pagtambal sa mga nagmasakiton. Wala’y daghang mga ritwal, hinunoa gigamit niya ang epektibong pamaagi sa pag-ampo.
Gamhanan ang pag-ampo ug dili kini angay nga ibalewala. Matang sa pag-ampo nga nagsukad sa pagtuo. Pagtuo nga ang kaayohan mahitabo gumikan sa makaalim nga gahom sa Dios. Hinuon, ang pag-ampo kinahanglang i-uban usab sa mga kahimanang medical ning atong kapanahonan. Gigamit man pud sila sa Dios alang sa kaayohan sa tawo gikan sa balatian.
Ning atong lindog karon, atong ipunting ang atong pamalandong sa kalambigitan sa pag-ampo diha sa pagkab-ot sa kaayohan sa tawo. Atong himuong sukaranan ang libro ni Francis McNutt: “The Prayer that Heals”. Ako kining ihalad alang sa tanang mga nagmasakiton nga unta magpabilin silang lig-on ug dunay pagtuo sa Dios nga Labaw’ng Makagagahum ang Mananambal sa tanang Mananambal.