Ordinaryo na lang ang giingon nga kalbaryo sa mga ginikanan ang panahon sa tingklase. Tinuod man hinuon kini. Apan ang obligasyon sa mga ginikanan sa tinuoray lang, angayan nga tumanon. Mahinungdanon kaayo ang edukasyon kay kini ang lig-ong haligi sa usa ka tawo alang sa maayong kaugmaon.
Kanunay natong mabalitaan diha sa telebisyon ug sa mga mantalaan ang kakulang sa mga magtutudlo ug classroom. Ang gobiyerno nato karon naglihok aron pagsulbad niining maong problema. Apan matag ting-abli sa klase kini usab ang kanunay nga masugatan nga problema sa nasud.
Panahon na tingali nga hatagan og dakong pagtagad sa kagamhanan kining problemaha, nga gahinan og dako gayod nga budget ang Departamento sa Edukasyon. Samtang ang gobiyerno nanikaysikay sa pagpangitag sulbad sa kaubos sa atong ekonomiya, sa kamahal sa mga palaliton ingon man sa krudo, gasolina ug uban pa, maayo usab nga susihon gayod pag-ayo kun asa o kun unsa ang dakong rason sa gihisgotang problema sa Edukasyon sa nasud.
Ang problema mapangitaan og sulbad kun makita sa tinud-anay ang gigikanan sa problema, kun diin kini magsukad, kun nganong nahimo kining problema. Sa ato pa, sa higayon nga makita gayod ang lintunganay niining problemaha, dili na lisod ang pagpangita’g paagi sa pagsulbad niini.
Dili gayod maayo nga ang mga estudyante maghuot sa usa ka klasrom, langas ug dili kaayo sila makat-on kay ang magtutudlo dili man usab makatudlo pag-ayo. Mao man gani nga sa higayon nga anaa sa hustong dapit ang usa ka estudyante sa iyang pagtungha, haruhay ang iyang pag-estudyo sa gitudlo kaniya sa iyang magtutudlo.
Ang dakong problema anaa sa elementary level kay lagi kuwang og classroom ug magtutudlo. Apan ang elementarya mao ang pundasyon sa usa ka estudyante nga lig-on ang nakat-onan aron makalahutay siya sa klase sa hayskol ug kolehiyo.
Kun kuwang ang nakat-onan sa estudyante sa elementarya, dako ang purohan nga hinay siya sa klase sa hayskol. Ug kun mahitabo kini, kuwang siya’g alamag pag-abot na niya sa kolehiyo.
Busa, ang gobiyerno sa nasud angay nga mangita gayod og hustong sulbad sa dakong problema sa Departamento sa Edukasyon. Ilabi na niining kakuwang sa classroom ug magtutudlo.