Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Milabay na gayod ang adlaw nga gikahinaman sa katawhang Pilipinhon nga mao ang pagpakanaug sa hukom sa mga senador sa impeachmement case ni Chief Justice Renato Corona nga misangpot sa pagkatangtang niini sa katungdanan.
Sa pagtimbangtimbang sa mga senador sa mga reklamo sa 188 ka mga senador maoy ilang nakita nga ang pangulong mahistrado nakahimo gayod og kalapasan.
Nunot sa pagtangtang kang CJ Corona sa iyang katungdanan daghan usab karon ang nakaingon nga magsilbi unta nga panag-ingnan ang nasinati sa pangulong mahistrado sa uban nga mga opisyal sa kagamhanan sa paglikay sa paghimo og susamang mga kasaypanan.
Sa nasayran nga gipasikad sa 188 ka mga kongresista ang ilang reklamo sa wala pagtug-an ni Corona sa iyang katigayonan ug mga kabtangan sa iyang Statement of Assets and Liabilities and Net Worth.
Gipasanginlan ang pangulong mahistrado nga nagbaton og minilyon nga salaping Pilipinhon, dolyares ug ingon mga kabtangan nga wala ilakip niini sa pagtala sa iyang Statement of Assets and Liabilities and Net Worth.
Hinuon ang maong mga pasangil hugtanon kining gipanghimakak ni CJ Corona sa iyang pag-atubang sa impeachment trial ug sa atubangan sa katawhang Pilipinhon iyang gipasabot ang maong mga salapi ug kabtangan nga iyang naangkon.
Bisan sa mga pagpanghimakak ni CJ Corona sa mga kalapasan nga gipasangil ngadto kaniya sa gihapon wala makombinsir ang mga senator judges sanglit natibuok man ang hukom sa 23 ka mga senador nga gipangulohan ni Senate President Juan Ponce Enrile.
Sa 23 ka mga senator judges ang 20 kanila mihukom nga sad-an si CJ Corona batok sa tulo lamang kanila ang mihukom nga dili kini sad-an sa impeachment case nga iyang giatubang.