Wa pa man aprobahi sa mga magbabalaod sa nasud ang balaodnon nga maghatag og P100 mil sa matag tawo nga makasaulog sa iyang ika-100 ka tuig kay malagmit ila pang gi-estokadahan pag-ayo kun unsay ikahatag nga kaayohan niining kuwartaha ngadto mismo sa ilang hatagan.
Kay ang labing tinuod, ang labing makapahimus ning kuwartaha, mao ra gyud ang mga anak ug mga apo sa hingtungdan.
Kay ang 100 nga edad karong panahona, lisud na kaayo nga makasuroy -suroy , aron pagpahayahay o kaha paglingaw-lingaw sa kaugalingon.
Busa sa laktod imbis ang tiguwang maoy makapahimus sa maong kuwarta, adto na hinuon kini sa mga batan-on ug busa di kini makasilbi sa tinuoray niyang katuyoan.
Kun imo bayang sutaon, usa man kini ka hinakog , kay ang kagamhanan sinserong molingaw o mohatag og kaayohan sa mga senior citizen nga baskog pa og lawas, mas maayong sugdan nila ang pagpanghatag niining maong kantidad inigtukma gyud og 60 anyos sa usa ka tawo.
Kay kun paabuton pa nila ang 100 ka tuig , una hatagi ang tawo niini, unsa pa may pus niini ngadto sa hatagan?
Tinuod may 20 porsiyento nga diskuwento ang gihatag sa gobiyerno ngadto sa mga senior citizen alang sa nagkalainlaing serbisyo, sama sa medisina, hospital, transportation, pagkaon o bisan sa kalingawan sama sa senihan.
Apan kun naghunahuna silang mohatag pa gayud og dugang kalipay sa mga tiguwang pamasin nga hasta silang magbabalaod makaabot usab bisan og 60, o 70 anyos ba, nganong di man nila sugdan paghatag og P20 mil inigtangkod og 60 anyos sa matag tawo.
Isunod ang dugang P20 mil inigka-70. laing P20 mil inig-ka 80, P20 mil na usab inigka- 90, ug katapusang P20 mil inig-abot og 100 anyos.
Oh di ba sumada total, P100 mil ang tanan? O kun di man makaabot og 100 anyos ang usa ka tawo, aw nakapahimus pa siya sa mga bahin sa maong kantidad kutob sa tuig nga gitugot kaniya sa Dios nga mabuhi siya sa yuta.
Apan kining mga butanga maisip man gud nga usa ka homework sa usa ka magbabalaod nga angay niyang tun-an kun unsay maayong balaod nga makahatag og kaayohan sa mga senior citizen. Di ba?