Dili man sala kun duna kay mga higala nga mga opisyal sa kagamhanan apan ayaw kini gamita aron nga moabuso.
Usa ka tawo nga nagsakay og motor nga walay side mirrors nasakpan nako atul sa checkpoint namo sa LTO-Task Force Alpha didto sa Mabolo kaniadtong Biyernes sa hapon.
Ang maong tawo mihangyo dayon nga dili siya dakpon kay amigo kuno sila og si Atty. Vicente Gador, ang legal officer ug acting chief sa LTO-Cebu City licensing division.
Ingon ana diay na? Ang tumong diay ninyo sa pakighigala sa mga opisyal sa LTO aron dili mo dakpon sa paghimo og abuso? Kadaghan na gayod ko makasugat og mga tawo nga moangkon dayon nga amigo sa taga LTO kun sila madakpan.
Dili lang nako ibutyag ang tinuod nga ngalan sa maong tawo apan “Lim” ang iyang bansagon. Kun nakaila ka niya Atty. Gador mas maayo tingali nga imo siya nga disiplinahon.
Pasensya lang gayud mo kay kami sa LTO-Task Force Alpha dili man gusto nga ingnon ta sa publiko nga pili-pilion lang ang dakpon. Ang tambag nako, kun makighigala mo og mga opisyal sa LTO, sunda ang balaud. Kun dili kamo motuman sa balaud, tabla ra nga gibugal-bugalan ninyo ang higala ninyo nga opisyal. Kauban gani nako sa The Freeman nga dunay kalapasan ako man gayud nga giprangkahan nga dakpon g’yud nako siya kun maatlan namo siya sa checkpoint.
Tan-awa, giusab niya ang binuang sa iyang sakyanan. Ang among silingan nga punder ang suga, gidakop man gani gayod nako kay ngil-ad man nga dili nako siya dakpon unya ang uban gidakop.
Mahigalaon kaayo kaming mga sakop sa Task Force Alpha, apan estrikto kami sa mga badlongon, ilabi na sa mga tawo nga “gahi’g ulo” unya kun madakpan pwerte nga makahangyo nga dili sakmiton ang lisensya.
* * *
Akong pasalamatan daan ang kadagkoan sa Metro Cebu Water District (MCWD) nga gipangulohan sa ilang chairman nga si Leo Pacaña kay gipasalig nila nga susihon kun mahimo ba kami nga makonektahan og water connections ang mga lumulopyo sa Sitio Upper Fatima, Barangay Apas.
Gikontak ko ni Leo kay nagpadala man ko og letter request didto sa MCWD nga naghangyo nga iabut didto sa Sitio Upper Fatima gikan sa Barangay Busay Hall ang ilang tubo sa tubig.
Salamat daan Sir. Daku kaayo nga tabang kun makonektahan mi’g tubig kay gikan sa tag P1,152 ang bayranan sa ubang lumulopyo sa maong dapit tungod sa kamahal sa gibaligya nga tubig, moabut na lang unya og P300 ang bayranan kun ang tubig direkta na sa MCWD lines. Karon gud, nag-antos sa inantigo nga paagi ang maong mga pamilya mao nga grabe kamahal ang tubig nga ilang gigamit nga tag P75 kada cubic meter kon tag P30 ang baril. Sa laktud, gipilo og kalima ang orihinal nga presyo.
* * *
Sugyot nako nga maayo tingali nga tangtangon na lang ang “center island” nga anaa taliwala sa karsada sa Juan Luna Avenue sa Mabolo hangtud na sa Archbishop Reyes Avenue.
Ang tumong niini aron molapad og gamay ang karsada. Kanunay ko nga makaagi diha pwerteng huota sa mga sakyanan nga mangagi sa maong karsada.
Mentras dili pa kita makapalapad sa karsada sa daplin, mas molapad kun wala na kining maong “center islands.”
Palihug kuno Mayor Mike Rama, CITOM chairman Jack Jakosalem, estudyohi ninyo kining akong sugyot.