( Gikan sa Libro: Relationship Strategies for Success ni Madam Saluja )
Ang tawhanong pakiglambigit karong mga panahona ang mahimong atong mahulagway ning mosunod:
A. Hinanaling paghatag og desisyon/hukom.
B. Hinanaling pag-ilis sa mga higala/kaminyoon o hinigugma.
C. Paggamit sa mga hunahuna o kasingkasing sa walay hinungdang pagbati, pagsaway, o kaha panimalos.
D. Ang paghunahuna sa KAUGALINGON lamang
E. Kasina, Kompetisyon, Palabwanay.
Pipila lamang kini sa mga butang nga nihulagway sa tawhanong kalibutan karon, ang kalibutan sa pakiglambigit. Ning atong lindog karon tugoti ko nga atong pamalandongan, ampoan, ug susihon kun naunsa na kita diha sa atong pakiglambigit o diha sa atong kinabuhing malambigiton. Subo lang palandungon nga nahimong functional ug pragmatic lamang ang atong pagtan-aw sa tawo o sa usa ka relasyon. Sama pananglit ning maong panultihon nga nagkanayon: " To be born a gentleman is an accident but to die a gentleman is an achievement." Gumikan sa dili hamtong nga panlantaw sa kaugalingon ug sa kinabuhi, atong nakita nga ang kalibutan imbis langit ang nahimo na hinuong usa ka konkretong impiyerno.