Tan-aw nako may angay gayud usbon diha sa Land Transportation Office (LTO) aron molambo ang ilang serbisyo. Klarohon lang hinoon nako nga dili mabasol niini ang kadagkoan sa LTO dinhi sa Central Visayas apan ang mabasol mao ang mga opisyal didto sa kaulohan.
Makapangutana kita nganong mahutdan man sila sa mga plaka kon plate numbers sa mga sakyanan? Apil sa mahurot mao ang mga “current year sticker” nga ihatag unta sa mga mopa-rehestro sa ilang sakyanan. May gipalit man gud ko nga sakyanan ug buot unta nako pangayoan og original plate numbers apan giingnan ko ni LTO-7 Regional Director Raul Aguilos nga nahutdan sila sa mga plate numbers.
Si LTO-7 Assistant Director Arnel Tancinco mipahibalo usab nga wala na sila’y bag-ong plate numbers ang tanan gayud nga LTO district offices sa Central Visayas. Ngano man kini?
Dili ba kanunay man nga nagpahimo ang LTO-Manila og mga plate numbers? Unya nganong duna may mga sakyanan nga pangpasahero nga hinimo ra ang plate numbers?
Dugay ra ko nakabantay sa palpak sa LTO. Sama kun magpa-renew ka og rehestro sa mga sakyanan nga wala sila’y ika-isyu nga sticker sa “current year” nga gibag-o nimo ang lisensya.
Sagad sa mga resibo nga giisyu sa mga tag-iya og sakyanan human sila makapa-renew sa ilang rehestro gitamlaan ra og pulong “Sticker Not Available.” Kanunay nako kini nga makita kun maghimo kami og operation. Dunay mga sakyanan, sagad mga PUJ, nga gipara nako kay nahibulong ko nga duna na may mga letters ug numero ang plate numbers, apan improvised man. Nahibaw-an nako nga gitugotan ra sila nga mogamit og plate numbers nga pinahimo kay wala pa moabot ang maong mga original plates.
Kun moabut na ang maong mga plaka, maisyu pa kaha kini sa LTO ngadto sa mga operator? Dili kaha magtipun-og lang kini diha sa ilang stockroom?
Usbon nako, walay sala ang mga opisyal sa LTO dinhi apan angay sila nga mohatag og sugyot sa Manila aron makorehean kining problemaha.
* * *
Isip law enforcer sa LTO, may sugyot gani ko kaniadto pa, nga unta ang mga stickers lain-lainon nila ang kolor sa matag tuig. Sa ingon nga paagi masayon ra alang kanamo ang pag-ila hain kadtong mga sakyanan nga posible wala mabag-o ang rehestro sa “current year.” Pagka karon kay pulos ra man green ang kolor, matagbaw tawon mi og siga-siga sa among mata aron pagtan-aw hain sa mga sakyanan nga nagdagan nga wala pa marehestro.
Sagad gayud nga mabawo mi. Daghang sakyanan nga walay “current year sticker” apan inigtan-aw namo sa resibo sa rehestro, dunay tamla nga “sticker not available.”
Pananglit green ang 2011, himoon unta nga red na usab ang 2012, unya yellow ang 2013 sayon ra kaayo alang sa mga law enforcer ang pag-ila kun hain sa mga sakyanan ang expire na og rehestro.
* * *
Lain nga angay’ng usbon sa LTO mao nga ang mga “stickers” sa plate numbers kinahanglan g’yud unta nga kanang dili makawat.
Duna man go’y ubang mga tag-iya og sakyanan, ilabi na motor nga kay wala sila makaparehestro mangawat ra og stickers aron ingnon nga napabag-o nila ang ilang rehestro.
Dili ba maayo ang akong tambag Sir Aguilos? Sir Arnel?