Kumusta sa tanang suki sa Banat News. Laing pangutana ang atong tubagon karon may kalabutan kini sa utang pinaagi sa credit card.Nasayud ko nga kadaghanan karon sa mga tawo adunay mga credit cards ug mao ni sagad nilang gamiton kun sila adunay paliton.
Dear Atty. Divine,
Usa lang ko sa imong mga sumusunod og magbabasa sa imong column nga Legal Corner sa Banat News. Ang akong suliran karon may kalabutan sa akong credit card nga maoy akong gigamit sa akong pagpang grocery kun maapiki ko og wa koy kwarta. Miabot na karon attorney ang akong utang sa credit card og P 30,000.00 ug maglisud pa ko sa pagbayad niini ilabi na kay pulos estudyante ang akong mga anak. Ang akong asawa, nahadlok na kay wa pa man gyud mi makasugod og bayad sa maong utang. Ang akong pangutana attorney unsa may among buhaton nga wa pa man gyud mi ikabayad? Mapasakaan ba mi og kaso ug mapriso ba mi tungod ning maong utang? Hinaut imo kong matubag ning akong pangutana. Daghang salamat. — Ken”
Dear Ken,
Salamat sa imong pagsunod sa atong column ug sa pagbasa kanunay sa Banat News. Basi sa atong balaod sa Bill of Rights sa Article III, section 20 sa 1987 Constitution, kini nagkanayon “Sec. 20. No person shall be imprisoned for debt or non-payment of poll tax.” Buot ipasabot nga way tawong mapriso tungod lang sa utang, gawas lang kun mi-issue ka og checke unya miuntol kay way pundo busa usa na ka na ka criminal offense kon kalapasan sa Batas Pambansa Bilang 22 kon Bouncing Check Law ug mamahimo sab ka nga makiha og Estafa. Ang epekto lang niining wa nimo pagbayad sa imong credit card mao ang kanunay nga pagsaka sa imong bayranan tungod sa interest nga ilang ipahamtang matag buwan. Kun padayong mosaka ang imong utang, ang ubang lending company mopasaka og civil case ngadto sa korte for collection of money, apan kanang maong kaso di gihapon na makapapriso nimo apan ma-obligar ka sa pagbayad sa maong utang. Busa ang maayo nimong buhaton karon, hinay-hinayi lang sa pagbayad ang imong utang kun aduna kay kwarta unya hangyoa nga minusan lang ang interest aron di kaayo modako ang imong bayranan. Hinaut nga nakahatag ni og katin-awan sa imong problema. — Atty. Divine
Sagad nga buhaton sa mga utangan nga di makabayad mao kining paglikay-likay ug pagtago-tago kun paninglan hinungdan nga masuko ang ilang giutangan. Natural ra man ning mangutang ta kay sa kalisud ug kamahal sa atong palaliton karon di gyud makaigo ang atong income ilabi na kun aduna tay mga estudyante apan ako lang tambag ninyo nga di ta mangutang kun dili importante aron di ta maputos sa utang ug maproblema na hinuon sa pagbayad niini. Importante ilabi na natong mga minimum wage earners nga makamao tang mo-budget sa atong kinitaan ug makamao tang motipig kun adunay sobra aron aduna tay makuot sa panahon nga kita magkinahanglan ug dili ta mapugos sa pagdangop sa mga lending companies nga adunay dagkong interest nga ipahamtang. LEGAL CORNER, Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Niño, 6000 Cebu City or email sa flores_divina@yahoo.com