Human sa taas-taas nga bakasyon, nindot paminawon kun ang mga tawo nakabalik na sa naandan nilang tulomanon sa kinabuhi.
Gani, mibalik na ang pagpangubkob sa bisan nindot pa kaayong mga karsada aron ilisan og bag-ong aspalto. Apan ambot kaha og molungtad ba kini og dugay kining mga aspaltoha, kay basin unya og hangtod sa eleksiyon lang kini ug inigkahuman mangapakpak lang ug mag-antos na usab kita og tulo ka tuig sa mga libaong ug lubaklubak.
Hinaot unta makaamgo ang mga politiko nga nakasakay niining binuanga (pagpang-aspalto sa mga sinaw nga karsada) nga ang ilang gihimo makatabang sa hamubo nga panahon lamang.
Sa ako hinuong tan-aw, malisod na maundang kining binuanga kay hasta man diay sa Mindanao ug kaulohan, sige man ang pagpang-aspalto sa mga karsada bisan wala pa kini maguba.
Ang isyu niining binuanga nga wala matubag sa Department of Public Works and Highways (DPWH) ug sa mga politiko mao ang “priority.” Aduna pay daghang angay unta unahon (prioritize), apan nganong ang pagpang-aspalto sa karsada nga maayo pa maoy ilang gi-una karon.
Apan ambot og makahunahuna ba kaha ang mga politiko nga murag busy naman sila karon paghinayhinay og kamas alang sa sunod tuig nga eleksiyon.
Gani, si Mayor Micheal Rama nagpunay na og duaw sa mga gipang-aspalto nga mga karsada. Siyempre, ipakita gyud niya nga iyang performance ang pagpanindot karon sa mga karsada.
Sa south district, gisigehan gihapon og hisgot ang Tony Cuenco vs. Totol Batuhan fight sa pagka-kongresista.
Usa ka email akong nadawat agi’g reaksiyon niadtong miagi nakong Tikdol nga nangutana kinsa kahay “inilog” nilang Cuenco ug Totol. Naglibog ko unsay gipasabot sa nagpadala sa email, apan iyang gibalik-lantaw ang “history” sa politika nilang Cuenco ug Totol. Sumala pa niya nga si Cuenco kanunay’ng makadaog kaniadto batok kang Totol tungod kay sakop man siya sa BOPK. Karon kaha nga dili na siya BOPK, unya si Totol na ang ituboy sa BOPK dili ba kaha mabali ang hangin?
Hinuon, si Cuenco daghan pa og alalay nga mga barangay officials. Mao kini ipakita ni Totol unya ini’g sugod na sa showdown.