Ang Mantayupan falls sa lungsod sa Barili usa sa mga gasa sa kinaiyahan sa maong lungsod nga madanihon kaayong sud-ongon.
Tungod kay di komon, way tawo nga di madani ug mawili sa pagpahimus sa mga salibo sa iyang tuasik , kalandong ug sa kabugnaw paminawon sa lab-as nga tubig nga nagbuhagay gikan sa taas sa dakong bungtod ug nagbusagak nga miambak sa dakong wanang sa linaw sa ubos.
Ang kamingaw sa maong lugar kansang lim-aw nga giambakan sa nagputi nga buhagay sa tab-ang kaayong tubig gidungawan sa nag-atbang nga mga pangpang kansang mga ngilit gilibon sa nagkadaiyang mga kahoy nga nakapasamot sa kabugnaw sa palibot niini.
Apan sa usa ka tawo nga gustong mosud-ong sa palibot sa linaw nga giambakan sa nagbusagak nga tubig, usa ka dakong risgo ang imong presensya sa maong dapit.
Kay imbis malipay ka sa kalalim sa talan-awon nga molingaw sa imong mga mata ,mopauli ka nga may bukol ang bagol-bagol o kun dimalason ka, makuyapan ka didto o kaha mawad-an og kinabuhi.
Tungod kay way nag-atiman sa safety o kaluwas sa mga tawong mosuroy didto nga gihagit sa mga dagko kaayong tampong nga giputos sa mga lumot ug dangog kaayo nga kun mabunal ka ug mapantok ang imong ulo sa hait kaayong mga bato susama ra sa nagsakay ka og motorsiklo nga way helmet nga kun madisgrasya tagsa ray malibre.
Gawas niini, ang mga exit sa tubig nga magkanaas sa kakusog sa iyang sug padung sa ubos way mga screen.
Sa higayong ang bata o dakong tawo maanod, 100 porsento nga di gyud mabuhi tungod sa kadagko sa bato sa ambakanan sa tubig nga maoy mobola-bola sa lawas aron inig-abot niini didto sa labing ubos nga bahin sa sapa hutlay na.
Kun ang nagpadagan sa maong falls nga mangayo og tag P10 nga pulta o entrance fee naghunahuna pa sa ka-luwas sa kinabuhi sa mga tawong mosud-ong niini, tingale gisemento ug gipatag na ang palibot sa linaw, gihawanan sa lumot ang hait kaayong tampong ug gibutangan og screen ang mga exit sa tubig aron di makalusot ang lawas sa bata o dakong tawo nga maanod, ug kun di man kini pasuroyan ug pakaligoan, unta naghatag sila og warning.
Apan wa kini nila buhata, ambot ug ngano. Di ba?