BABALA ng Philippine Overseas Employment Agency o POEA, mag-dalawang isip bago sagutin ang mga job recruitment e-mail mula sa umano’y mga international company.
Sa BITAG, maka-sampung beses na aralin ang mga alok bago ito kagatin. Kapag padalus-dalos dahil sa sobrang excitement, baka agad ka ring mahulog sa kanilang patibong.
Para huwag mabiktima tandaan ang ilang tips na ito: Una, tingnan ang e-mail address ng sender.
Kung local o international company ito, dapat konektado ang e-mail nito sa kanilang website.
Karaniwan sa mga international company, nakalagay ang abbreviation sa dulo ng e-mail address kung saang bansa sila naka-base (hal.Fraser Health.ca – sa bansang Canada).
Ikalawa, magsagawa ng simpleng imbestigasyon. Hanapin ang mismong website ng kumpanya gamit ang internet.
I-check kung talagang may hiring na nasabing posisyon tulad ng nakasaad sa kanilang e-mail sa iyo.
Kung dito lamang sa Pinas madaling tawagan ang numero ng kumpanya, ngunit kung sa ibang bansa ito, makipag-ugnayan sa POEA. Maaaring iforward ang nasabing e-mail sa info@poea.gov.ph upang maberipika ito.
Ikatlo, walang dapat bayaran ang mga aplikante. Magduda na lalo’t sa mga remittances center at personal na pangalan ng tao ipapadala ang kung anu-anong fees na kanilang hinihingi.
Ikaapat, mag-ingat sa pagpasok at pag-post ng inyong mga resume na may mga personal information sa mga job website.
Hindi lamang ito babad sa paningin ng mga prospective employers kundi magagamit rin ito ng mga scammers para kayo’y biktimahin.
Ang manloloko, may malikhaing pag-iisip. Kailangan lamang ng pagkakataon at oportunidad para makadagit ng bibiktimahin.
Kaya’t kapag hindi naging listo, imbes trabaho ay sakit ng ulo ang mapapala mo. Mag-ingat, mag-ingat!