Hapit na ko mosurender sa impeachment process. Mora’g way kapaingnan. Ang depensa nilampos pagtabon sa mga ebidensiya. Ang prosekusyon nagkapandul-pandol. Pipila ka senator-judges nilingiw samtang giyatakan ang mga lagda sa kaligdong. Sama nimo, gitugyan na lang nako sa Ginoo ang pagpahamtang sa hustisya sa Iyang panahon.
Apan ang imong pamilya nipakita. Gipakauwawan kang Corona, hapit na lang pasanginlang gi-angu-ango. Dihang nakita tika sa TV, gihabolan ka sa kalinaw. Nga mamugna lang sa tinuoray’ng pagpasaylo. Determinado ang imong tingog—pintok ug lumo. Matud nimo ang pagka manggihatagon nakaaghat nimo pagpasaylo sa mga Corona, apan ang hustisya nakapugos nimo pagbutyag sa kamatuoran mahitungod ni Renato Corona.
* * *
Gawas nga maayo nimo, gipakita sa Ginoo ang dakong kaluoy sa katawhan. Samtang daghang hamtong masakiton, gigasahan ka’g himsog nga panglawas ug tin-aw’ng panghunahuna. Tungod sa talagsaong katuyoan. Dihang ang pakigbisog hapit na mapukan, niabot ka sama sa hayag nga bituon pagpahinumdom namo sa di pagpakawa sa paglaom.
Salamat sa imong kaisog pagsangyaw sa kamatuoran. Dihang gipamugos siya ni Gloria Arroyo sa Korte Suprema, mahimong nilampos si Corona pagtago sa iyang baho gikan sa Judicial and Bar Council ug sa iyang kaubanan nga nipatigbabaw ang iyang midnight appointment. Wa ko magtuong iyang mapawong ang nagdilaab nga kamatuoran nga imong gikuptan.
* * *
Palihog lingkod sa witness stand. Palihog itug-an giunsa ining nangangkon nga iyang katungod ang pagka Chief Justice pagpahamtang og inhustisya sa iyang mga paryente sud sa 30 ka tuig. Palihog tug-ani ang mga senador giunsa paggamit ang gahom nga way kaligdong batok sa katawhan nga angay untang silbihan ug panalipdan. Ikaw, nga tiguwang na, kansang bugtong hinagiban mao rang kamatuoran, makatudlo sa mga nahubog sa gahom sa leksiyon sa pagpaubos.
Tingali sobra ra ning among gipangayo gikan sa 90 anyos nga alagad sa Ginoo. Apan among kaugmaon ug sunod nga henerasyon ang nahilambigit. Kun palabyon kining panamastamas, sama rang gibaligya ang atong kalag ngadto sa yawa. Unsa may atong gitudlo sa mga bata? Nga kun katagoan sa mga lagda sa korte, mahimo rang magbinuang? Nga mamintaha basta madaog lang sa korte? Nga yatakan ang katarong kay dunay banggiitang mga abogado nga molungi sa kamatuoran? Mao ba ni atong tinguha alang sa nasud? Palihog ingna mi nga dili, Sister Flory. Alang sa kaayuhan sa nasud, palihog ingna mi nga dili.
* * *
Kun pakauwawan ka sa Senado, ug simbako dunay daotang mahitabo nimo, momartsa ko sa kadalanan bisan mag-inusara, ug mangilaba sa Ginoo nga ablihan ang dagat ug lamyon ang Senado ug tanang nilawog ining nasura sa kaalaotan.
Ang Ginoo naa nimo. Naa mi nimo. Tarong nga mga Pilipinhon naa nimo. Di ta magpabilin sa kangitngit. Naa nimong kahayag. Giyahi mi sa kaluwasan sa nasud. Panalanginan ka sa Ginoo, Sister Flory.
(Suwat ni DEN alang ni Sister Flory Basa nga gidasonan na sa kaliboan nga nakabasa ini sa social media networks).
* * *
Email: leo_lastimosa@abs-cbn.com