Daghan ang mga malapason sa mga drayber sa sakyanan dinhi sa Sugbo nga maoy hinungdan nga daghan usab ang madakpan sa Land Transportation Office (LTO) 7 ug Land Transportation Franchising and Regulatory Board (LTFRB) 7 ug makabayad kini og dagkong kantidad isip multa nga gipahamtang batok kanila.
Giangkon usab kini ni LTFRB 7 Director Ahmed Cuizon ngadto sa mga tigbalita nga nakighinabi kaniya dili pa dugay ug kamatuoran niini nahimo silang ikaduha nga mga buhatan sa ilang kaulohan nga labing dako og nakolektang salapi sa tuig 2011 ug ang sagad niini gikan sa multa nga gibayad sa nadakpan nga mga drayber.
Naglakip sa kasagaran sa mga kalapasan nga pagahimoon sa mga PUJ drayber mao ang dili paghatag og diskuwento sa mga senior citizen, mga tinun-an o mga pasahero nga adunay kabilinggan sa ilang panglawas nga kun ireklamo ang drayber nga hingtungdan dako kaayo og mabayran nga multa.
Dugang nga kalapasan sa mga PUJ drayber mao ang pagpakanaug sa mga pasahero human sa paghatag sa plite ug dili na ilahos ngadto sa ilang rota pinaagi sa pagpasangil nga mokaon pa o mopaingon na sa ilang paggarahe.
Kini sagad masinati sa dalan M.C Briones sa Highway sa dakbayan sa Mandaue nga ang mga pasahero sa panahon sa gabii o kusog ang ulan ug daghang pasahero sa dakbayan sa Sugbo dili na molahos sa ilang rota.
Apan ang tinuod human sa pagpanganaug sa pasahero ug magkabuang na sa pagsakay ngadto sa laing PUJ nga molahos sa ilang rota, mobalik kini sa ilang agi sa pagpadayon sa ilang pagpamasahero.
Ug mao usab kini ang gihimo sa mga drayber ug dili pa mogamit sa ilang metrohan kay gusto sa pakyaw nga pagbiyahe kay makapatuyang man sila sa pagpangayo sa kantidad nga ilang ipaplite niini.