Bitoy: Oy Inday Miguel nagpabadlis ka sa Miyerkules?
Inday Miguel: O oy! Ako pa.
Bitoy: Asang simbahana?
Inday Miguel: Sa simbahan diay ang badlis?
Bitoy: Asa man diay ka nagpabadlis?
Inday Miguel: Duljo! (Toink!/Aguy!)
Hehehehehehehehehehehehehe
Walay lalis nga ang mga hamtong nakasabot sa sakripisyo nga gipasabot sa unang adlaw sa kuwaresma nga gitawag sa simbahang katoliko og “Ash Wednesday o Miyerkules badlis”. Apan kun ang mga batan-on maoy imong pangutan-on, kadaghanan gawas sa mga tinun-an sa mga katolikong tulonghaan, sa ilang yanong pagsabot ang Miyerkules badlis nagpasabot og “off limits” sa baboy.
Dihay managhigala nga katoliko ug muslim.
Igso: Unsa manang itom sa imong agtang?
Bitoy: Sa amo sa mga katoliko badlis ron nagpasabot na dili mi kakaon og baboy.
Igso: Aha! Sakpan na gyud ta mo bay.
Bitoy: Unsay sakpan?
Igso: Dili man kaha mo mokaon og baboy basta naay badlis?
Bitoy: O lagi.
Igso: Ahhh! sakpan mo nga inig kwarisma diay ang mga katoliko mangopya sa muslim.(Toink!)
Hehehehehehehehehehehehehehe!
Ang Ash Wednesday nagsimbolo og sakripisyo. Alang sa uban ang dili pagkaon sa karne igo na nga tampo pagtimaan sa kwarisma. Sa wali ni Padre Rosdel Noel sa parokya sa Santa Teresa de Avila sa Dakbayan sa Talisay ang matag letra sa pulong “ASH” nagsimbolo og kaakohan. Ang letrang A nagkahulogan og “Alms giving” kon pagtabang sa mga nanginahanglan, ang S nagkahulogan og sacrifice kon sakripisyo samtang ang H nagpasabot og holiness kon pag-ampo ug pangaliya sa labaw’ng makagagahum.
Kun atong sumadahon dili lang ang paglikay sa imong mga paboritong pagkaon sama sa karne ang angay isakripisyo panahon sa kuwaresma. Mahimong palapdan ang pagkamatinabangon, sakripisyo dili lang ang paghikaw sa imong kaugalingon sa imong mga naandan kun dili labaw na ang paglikay sa paghimo og sayop ug labaw sa tanan ang pagpalawom pa sa imong pagsalig ug pagtuo.
Buloy: Hoy! Mengoy wala diay ka magpabadlis.
Mengoy: Ay wala lang Loy aron dili maalanganin.
Buloy: Unsay maalanganin?
Mengoy: Kana man gung magpabadlis ka timaan gyud na sa puasa, nahadlok ko basin balibaran ko sa akong asawa kay nagpabadlis ko.(Toink!/Asus!)
Mao! Hehehehehehehehehehehehehehe!
Kun wala ka magpabadlis wala na magpasabot nga libre ka sa bisan unsay imong gustong buhaton sa pagtimaan sa kuwaresma. Ang paghimo og sakripisyo sa ngalan sa Ginoo walay kontrata. Ang tanang anaa magpahiluna sa imong hunahuna, kasingkasing ug pagtuo. Amen!
* * *
(emailad:jomar_bellita@yahoo.com)