Ang katungdanang pagka-purchaser o piyado sa unsa mang opisina sa pagpamalit sa mga panginahanglanon sa iyang buhatan usa ka makapatintal kaayong katungdanan.
Murag magpanilap ang tentasyon niini nga kun wa kay hunahuna nga mo-overprice sa imong komprahonong mga butang, may mga tindahan nga maoy motanyag kanimo og komisyon ilabi na kun mahimo na nimo silang suki.
Unya kun gamyan ka ra sa komisyon, konsabohon nimo ang tagdumala sa tindahan aron sabotan pilay inyong i-overprice sa imong komprahong mga baligya.
Mao bitaw tong taga DPWH ug mga kakonsabo nilang mga opisyal sa gobiyerno nga nasikwati gumikan sa overpricing. Tiaw mo bay ang tag-P10 mil kuno nga lamppost gihimong tag P250 mil, Hesus, asa naman ipamutang nang ginansyaha oi.
Unya nagtuo ta nga mahadlok na ang ubang mga opisyal sa kagamhanan nga nasayud sa gidangatan sa mga hingtungdan.
Wa man diay , kay nakaabot man sa dunggan ni Mayor Mike Rama ang report nga ang taga DPS kuno nasakpang nagpa-overprice sa kinompra nilang mga piyesa sa sakyanan.
Kompiyansa lang tingale ang mga hingtungdan sa pagtuo nga di sila hisakpan.
Asa ka di hisakpan, nga kasayon ra sakpon sa maong buhat, pila ray pagsusi ngadto sa tindahang imong gikomprahan sa mga butang ug mahibaw-an dayon sa mosusi ang imong binuang bisan piyongan pa nila.
Aw kun mamatud-an ni, ambot makasustiner ba kaha ang ilang ginansya sa overpricing sud sa pila ka buwan nilang pangapkap og laing trabaho kun matangtang sila sa ilang trabaho karon.
Kay kini , matang man gud sa pangawat nga lisud kaayong mapasaylo , magamay o madako ang kantidad nga malambigit.
Pastilan, imbis magpaabot og pension inig-retiro na, mawagtang na hinuon ang tanan kun mapapha sa trabaho ug ang makaluluoy mao ang asawa ug mga anak. Aw maayo lang kun kuwartahan na kaayo sama kang CJ Corona. Di ba?