Awhagon nako si Joel Obenieta, ang gitangtang nga canvasser sa Department of Public Services (DPS) sa City Hall, nga magpa-interview siya nako aron tin-awon ang posible niya nga kalambigitan sa pagpa-overprice sa mga gipalit nga pyesa sa sakyanan.
Basin og adto ka ra magpa-interview sa ubang reporters nga wala kaayo masuheto sa isyu ug ibutang ra dayon nga nanghimakak ka sa pasangil. Dihang gipagawas nako kining maong balita sa The Freeman kaniadtong Domingo, duna ra ba’y reporter nga wala g’yud maghago ug ang gisuwat mao ra g’yud tawon ang pagpanghimakak sa balita nga akong gisuwat.
Nagkatawa lang kami si Konsehal Richie Osmeña kay human sa “denial news” nga gisuwat sa maong reporter kinsa mikutlo ni DPS chief Dionesio Gualiza, gitangtang hinoon ni Gualiza sa pwesto si Obenieta.
Dili ba kataw-anan nga gipanghimakak ni Gualiza sa balita sa maong reporter apan human migawas ang balita sa mantalaan, girelibohan niya si Obenieta?
Aw hinoon, basin ang nahibaw-an sa maong reporter mao ra usab ang pagpaninguha nga mapanghimakak sa opisyal ang akong gisuwat nga balita aron ipalutaw nga ako’y namakak. Karon kinsa’y namakak?
Kitang mga reporter mangita ta’g laing anggulo sa balita dili kay ang pagdangop sa labing sayon nga ang tawo nga “subject” sa balita igo lang papanghimakakon! He! He!
Buyno, balik ni Obenieta nga gibalhin na karon sa “garbage monitoring” maayo nga magpa-interview g’yud ka aron mapasabot nimo kun ngano nga sa giandam nimo nga Order Slip mahal man.
* * *
Ingon niini ang sitwasyon basi sa pagpasabot kanako ni Engr. Gualiza. Kay sila sa DPS mao man ang moayo sa gubaon nga mga garbage trucks, kun walay pyesa sa ilang stockroom mapugos sila pagpalit.
Si Obenieta ang mokontak sa mga baligyaanan aron kuhaon ang kantidad sa palitonon nila nga pyesa. Himoan ni Obenieta og Order Slip ug ipa-review sa section chief.
Ang mga dukomento nga nahuptan ni Konsehal Osmeña nagpakita nga ang Order Slip nga gihimo ni Obenieta gi-review ni Arsenio Uy Jr. nga maoy hepe sa Transport Property Section sa DPS.
Dayon ang dukomento gipirmahan usab ni Gualiza. Isip usa ka engineer, si Gualiza makabantay g’yud usab tingali kun mahal ra ang maong pyesa. Espoko mo nga ang usa ka Selector Cable gibutang nga P5,800 basi sa Order Slip apan dihang gi-canvass pag-usab sa mga sakop ni Konsehal Osmeña didto gihapon sa South Sea Auto Supply kantidad ra man diay og P800.
Kini tipik ra sa daghan kaayong mga dukomento nga gihuptan karon ni Konsehal Osmeña. Duna ko’y pipila ka dukomento nga gigunitan mao nga gusto nako nga ako maoy mo-interview ni Obenieta aron dili kay igo ra siya nga motubag nga dili tinood.
Labi na og ang reporter nga akong gipasabot maoy mo-interview ni Obenieta, aw “patay g’yud ko.” Sigurado man nga dauton ang akong balita kay wala man siya makakuha. He! He!
Kagahapon, gipangita nako didto sa DPS si Obenieta wala nako makit-i ug wala say mitug-an nako sa iyang contact numbers. Namalihog na lang ko ni Engr. Gualiza nga basin makatabang siya nga magkasultihanay mi si Obenieta.