Pagkakita sa akong amigo sa sticker sa city hall sa mga lingkoranan nga gipamutang sa dalan kilid sa pilgrim center sa Basilica, sa naglakaw pa ang mga novena-masses pagsaulog sa miaging fiesta Senior, iya kong gipangutana kun nanapi ba ang city hall. Wa ko katubag.
Sa sunod adlaw, nangutana ko sa mga tag-iya sa maong mga lingkoranan, nganong dunay mga sticker sa city hall ang ilang mga lingkoranan. Mitubag sila nga nagpasabot nga nakabayad na sila sa arkabala kon buhis.
Ang ilang paabang, P10 matag lingkoranan, ila ang P5, sa city hall ang P5. Mao ba? Ambut kinsay akong pangutan-on ini sa city hall bahin niini? Kun tinuod man, adunay 10 ka Novena-Masses matag adlaw, kun pila’y makita sa usa ka adlaw, i-multiply ni by 10 x 9 days … ubay-ubay’ng kwartaha. Sa ako lang, nakatampo ko’g P90 kay gihurot man gyud nako ang 9 ka adlaw, kaylagi, dili man ka maka-novena kun lima o pito ra ka adlaw. Mao bitaw nga sayop ang pag-ingon nga nine-day novena, kay ang novena siyam gyud ka adlaw.
Akong gitubag ang akong amigo nga wala manapi ang city hall … nag-negosyo lang. Samtang dautan ang pagpanapi, di man dautan ang pag-negosyo. Mao diay tingali to nga sigeng ulan-ulan sa naglakaw pa ang novenaryo.
* * *
Usa ka driver sa taxi misugilon nga gihunong siya sa taga-LTO ug gi-warningan kay wa magsul-ob sa hustong uniporme sa mga driver. Nag-T-shirt lang siya ug ang husto kono polo shirt gyud. Pasalamat siya kay warning lang, wala siya isyohi og citation ticket.
Ang Memorandum Circular sa LTFRB No. 2011-004, pinetsahan May 27, 2011, page 7, mi-specify sa oniforme: pula alang sa mga taxi driver, polo shirt or T-shirt with collar. Sa ato pa, mahimo T-shirt, basta dunay kwelyo.
Waa mahibawo ang taga-LTO ini?
* * *
Niining nagpadayon karon nga impeachment proceedings batok kang CJ Renato Corona, all of a sudden nangguho ang mga eksperto ug mga maayong lake sa balaud, lakip na mga newspaper columnists ug mga radio-TV commentators … sila ray nahibawo sa balaud, mga opinion dinhi, mga opinion didto, mas kamao pa sila kay sa mga Senator-Judges ug sa prosecutor ug defense lawyers.
Ako sa akong bahin, di man sad hinoon ko abogado … maghuwat na lang gyud ko nga mahuman ang hearing. Waa koy basabasa ug walay pupaminaw sa radio ug tan-aw sa telebisyon bahin sa impeachment. Ug waa may nawaa nako!.
Busa, lungsod, maghuwat lang ta. Kay usahay ang imong mga hunahuna ug komentaryo, makahaling sa dugang intriga ug kayugot sa mga lumalaban ni Noynoy ug Gloria. Sa mga istambay pa: “Let’s to wait and see!”