Ang giingong kapakyas ni Chief Justice Renato Corona sa pagsumiter sa iyang SALN mao ang usa sa mga gibasihan sa mga kongresista sa pag-impeached kaniya. Busa mahinungdanon gayod diay seguro sa mga opisyal sa gobiyerno ang pagsumiter sa ilang SALN?
Unsa ba kining SALN? Ang SALN mao ang minubo sa Statement of Assets and Liabilities and Networth. Ang balaod sa Pilipinas nagmando sa mga kawani o opisyal sa gobiyerno sa pagsumiter sa ilang SALN sa tagsa-tagsa nila ka opisina ug sa buhatan sa Ombudsman.
Tumong ug tuyo niining maong kamandoan mao ang pagsubay sa bahandi ug kabtangan sa mga nangimpleyo ug nanirbisyo sa gobiyerno. Dinhi gustong sutaon sa balaod kun mibukad o miburot ba ang bahandi sa kawani ug opisyal sa gobiyerno sa panahon sa ilang pangatungdanan.
Ang SALN angayan untang ipublikar aron kini masayran sa katawhan apan ang korte suprema higpit kaayo ang patakaran sa pagpagawas sa ilang SALN ngadto sa publiko. Ang maong higpit nga patakaran gisugdan kaniadto pang 1989 sa panahon ni Chief Justice Andres Narvasa ug gisunod kini sa mga nagsunod kaniyang Chief Justice hangtod karon. Apil sa misunod niining maong patakaran mao ang duha ka Sugboanon nga Chief Justice, sila si Marcelo Fernan ug Hilario Davide Jr.
Ang SALN sa mga sakop sa hudikatora dili basta-basta nga mapagawas ngadto sa publiko tungod kay gikinahanglan pa niini ang pagtugot sa 15 ka mga miyembro sa korte suprema apil na ang Chief Justice.
Karon gi-impeached si Chief Justice Renato Corona sa mga kongresista tungod sa kapakyas niini sa pagsumiter sa iyang SALN apan napamatud-an ni Corona pinaagi sa iyang Clerk of Court nga gipatawag sa impeachment court nga nagsumiter diay kini og SALN. Kay naapikhan ug nakalitan ang mga kongresista miliko, milalis ug miusab sa tiyorya sa ilang kaso pinaagi sa pag ingon nga napakyas si Corona sa pagpublikar sa iyang SALN ug gisingit ang ilang giingon nga illgotten wealth.
Apan ang tadhan ug tang-an nga abogado ni Corona milalis ug milantogi ngadto sa mga kongresista. Iyang giingon nga si Corona gitaral tungod sa kapakyas sa pagsumiter sa iyang SALN ug dili tungod sa illgotten wealth ug karon nga iyang napamatod-an nga nakasumiter siya sa iyang SALN wala nay rason pa nga ipadayon ang pagtaral ni Corona sa Article ug impeachment numero dos nga mao ang mahitungod sa iyang SALN.