Nunot sa kapistahan sa Mahal nga Senyor sa atong dakbayan, dili ikalimod nga magpiyesta usab ang eskuwelahan ni San Roque sa Yati, Lilo-an. Ang San Roque Child Development School ang nihimo sa pagsinulog ingon nga naandang tulomanon matag tuig nga tanan. Human sa Misa nagprosesyon dayon ug sa eskuwelahan nagsinulog uban sa mga kabataan nga estudyante.
Dili kaayo bug-at alang kanato ang magdebosyon sa mahal nga Senyor. Dili lang tungod kay siya milagroso kun dili sa Sikolohikal usab nga panlantaw sa usa ka gamay’ng bata. Ang usa ka bata dali ra kaayo natong maduol. Ang usa ka bata dali ra kaayo natong hangyoon, dali rang lingawon ug gani, dali ra usab nga mapahimuslan sa mga hamtong lampingasan.
Sa matag higayon nga magsaulog kita sa kapistahan sa Mahal nga Senyor ato untang hinumdoman kining mosunod:
1. Nga diha sa paghamtong sa pagtuo angay natong huptan ang kinaiya sa usa ka bata diha sa pagkayano ug pagkamapahiubsanon.
2. Nga ang piyesta Senyor nagdapit kanato sa paghimo og mga konkretong lakang aron pag-atiman sa atong mga kabataan aron mamahimo silang mapuslanon ug maayong mga lungsoranon sa umaabot. Pit Senyor!
Pag-ampo: Amahan nga anaa sa mga langit, ilhon unta namo nga Dios ang imong Bugtong Anak diha sa kaubos sa iyang kinaiya nga tawhanon ug simbahon unta namo ang Santo Niño nga among Ginoo nga gamhanan bisan diha sa kahuyang sa iyang pagkabata. Himoa nga magsunod kami kaniya sa matinud-anon nga kasingkasing. Tabangi kami sa pagdawat uban sa kahinangop sa usa ka bata sa iyang gingharian dinhi kanamo ug sa pagdangat sa ganti nga gisaad alang sa mga mapaubsanon. Pinaagi ni Cristo among Ginoo. Amen.