Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Hingpit na nga gibuksan ang bag-ong merkado sa dakbayan sa Mandaue nga maoy naghumpay sa gibating kahigwaos ug kabalaka sa mga opisyal sa kagamhanan nga naglantaw sa kaayohan sa kinabag-ang katawhan sa dakbayan.
Dili ikalimod nga taas kaayo ang kutay sa mga pag-antus sa mga opisyal sa kagamhanan nga nagplano nga maoy responsable sa katukoran sa bag-ong merkado publiko sa sitio Tribunal sa barangay Centro sa maong dakbayan. Gisugdan kini sa pagplano ni kanhi Mayor Thadeo Ouano nga karon board member na sa ikaunom nga distrito sa lalawigan sa Sugbo ug gipadayon kini sa kasamtangang administrasyon ni Mayor Jonas Cortes.
Sa pagsugod pa lamang sa plano alang sa katukoran sa maong bag-ong merkado walay puas ang nasinati nga mga pagsaway kang Ouano sa mga tawo nga wala makauyon sa maong proyekto.
Daghan ang nagtinguha sa pagpakgang sa maong proyekto ni Ouano ug naglakip na niini kadtong mga informal settler nga nagpuyo sa maong luna nga gitukoran niini. Gitinguha ni Ouano nga mabakante ang maong luna sanglit alang kaniya ang maong dapit haum man kaayo alang sa pagatukoron nga bag-ong merkado publiko sa dakbayan.
Bisan sa pagdumili sa maong mga informal settler sa pagbakante sa gipuy-an nilang luna nga gipanag-iya sa kagamhanan sa maong dakbayan sa gihapon nagmalampuson si Ouano sa mao niyang tinguha.
Dihang gisugdan na ni Ouano ang kaugmaran sa maong proyekto misamot pa gayod ang mga pagsaway sa mga kritiko nagdto kaniya ug mosangko pa gani sa pagsablig og buling sa iyang pagkatawo.
Niabot ang kinatumyan sa iyang termino isip mayor sa dakbayan ug daghan na ang gibati og kabalaka nga ang maong proyekto nga gisugdan ni Ouano dili na gayod mahuman ug gilantaw pa gani nga ipadpad na lamang kini ngadto sa limbo sa kawalaan. Apan nasayop ang maong panglantaw sanglit gipadayon man ni Mayor Cortes ang katukoran sa maong proyekto taliwala sa mga kakulian nga iyang nasinati sa paghatag niini og katumanan.
Nunot sa iyang paghatag og katumanan sa kaugmaran sa maong proyekto daghan pa gihapon ilabi na gayod sa mga manindahay nga nagduhaduha sa pagbalhin sa kakulang sa kasiguroan sa kahimtang sa ilang pagpaninda. Wala matugaw sa maong mga kakulian si Mayor Cortes ug iyang gihatagan og katumanan ang gidamgo nga bag-ong merkado publiko nga nakahatag usab og kahiamgo nga ang katukoran diay sa maong proyekto gitumong gayod diay alang sa kaayohan sa katawhang Mandauehanon.