Samtang naghuwat sa pormal nga pagsugod sa impeachment trial batok ni Chief Justice Renato Corona hinay-hinay sab nga gihikyad sa mga sakop sa House prosecution panel ang ilang mga ebidensiya atubangan sa publiko pinaagi sa media.
Unang gi-leak sa House prosecution panel ang pagpanag-iya ni Corona ug sa iyang asawa og Condominium unit sa The Bellagio Towers didto sa The Fort sa Taguig City sayo ning semanaha.
Ang maong condominium unit giingong mikantidad og P14 milyones nga iyang napalit niadtong tuig 2009 sa dihang nagsilbi pa siya isip associate justice sa Korte Suprema.
Kagahapon gitug-an na sab sa usa ka wala magpailang tinubdan gikan sa House prosecution panel ang laing condominium unit nga giingong gipanag-iya gihapon ni Corona didto sa Bonifacio Ridge, laing mahalon nga condominium didto sa Taguig City.
Dili pa ni mao sa mosunod nga mga adlaw gipaabot pa ang dugang expose gikan sa House prosecution panel.
Ang mga senador wala makaayon ug nasuko na sa gihimo sa mga sakop sa prosecution panel nga gipangulohan ni Ilo-ilo Rep. Niel Tupas tungod kay daw sa nawad-an na sila og respito sa impeachment court.
Usa sa mga wala makauyon sa gihimo sa prosecution panel mao si Senador Panfilo Lacson. Matud ni Lacson nga kalapasan sa usa sa mga probiso sa lagda sa impeachment ang gihimo sa prosecution.
Husto si Lacson ug ang ubang mga senador apan nganong dili man badlongon sa impeachment court ang mga tawo nga klarong buot lang magpasikat tungod kay dunay plano nga molansar og mas taas nga posisyon sa mosunod nga eleksiyon?
Angayang silutan sa impeachment court ang mga sakop sa prosecution panel nga mihikyad sa ilang mga ebidensiya atubangan sa media tungod kay maisip nga “subjudici” ug “contemptuous” ang ilang gihimo.
Tiaw mo nga ilang gidiskutir ang mirito sa kaso diha sa publiko samtang kini pending pa didto sa senado isip impeachment court.
Ang paghimo sa ingon usa ka tataw nga timailhan sa kakuwang nila og respito sa impeachment court.
Unfair alang sa mga senator judges nga mas una pa nga nahibawo ang media sa mga ebidensiya kay sa nila nga maoy mohukom sa kaso.
Gawas pa malisyoso ang motibo sa pagbulgar niini sa media tungod kay tataw nga gitumong ni aron pagkondisyon sa huna-huna sa publiko nga sad-an gyud si Corona.
Kun uroy human unya sa trial dili bastante ang ebidensiya o ba kaha ma-justify ni Corona ang iyang pagbaton sa maong mga properties unya i-abswelto siya sa mga senador?
Makaluluoy ang mga senador tungod kay sigurado nga kuninitan ni sa publiko ug posible pa nga mapasanginlan og dili mao.
Kun tinuod nga lig-on ang ilang ebidensiya angayang adto ni ipresentar sa mga sakop sa House prosecution sa impeachment court ug dili sa media tungod kay dili man ang media maoy mohukom sa kaso kun dili ang mga senador.
* * *