Ang nahitabo sa Cagayan de Oro daghan kaayong leksyon nga ikatudlo kanatong mga Filipino gumikan sa pagkabaniog nato nga kusog kaayo mangilog og butang nga iya sa gobiyerno.
Ang pagpuyo sa tampi sa sapa maoy kinaham sa kadaghanan tungod kay nasayud ang tanan nga iya sa gobiyerno ang sapa.
Tungod niini gusto sa kadaghanan nga pahimuslan, sa pagtuo nila nga makaayo kanila, apan wa nila hunahunaa nga gitikasan nila ang kauban nilang mga Filipino kay ang butang sa gobiyerno iya sa tanan por-iso di angay nimong solohon ang pagpanag-iya niini kun maayo ka nga Filipino.
Ang pagpuyo sa tampi sa sapa sama ra sa imong kabaw nga imong gihikot sa tampi sa atabay nga karaan nga walay koral ang baba.
Kumo kay ang kabaw, kabaw gyud, aw sa tanto niyang tuyok-tuyok sa palibot sa atabay natugpa siya sa ilawom niini mura lang og wa nimo tuyoa ang paghikog kaniya.
Ang atong mga magbabalaod wa pa makaalinggat sa pagpanday og balaod nga magdili ni kinsa man sa pagpuyo sa tampi sa sapa.
Kini tungod kay wa hisabti sa kadaghanan nga ang pagpuyo sa tampi sa sapa usa ka paghikog.
Ang nahitabo sa Ormoc diin mikapin sa lima ka libo ka kinabuhi ang nakalas sa dakong baha niadtong Nobiyembre 1991, usa na baya unta kadto ka homework sa mga magbabalaod nga magtukmod kanila sa pagpanday og balaod nga magdili ni kinsa man sa pagpuyo tampi sa sapa.
Apan wa , gipaabot pa nga mahitabo ang sa Cagayan de Oro sa miaging semana ug wala pa hisayri kun asa kahang dapita ang isunod. Di ba?