Naigo gyud si P-Noy sa sakit sa showbiz nga mao ang tsismis. Ug ang virus niining sakita gikan sa usa ka starlet nga nalambigit sa usa ka Cebuano basketball star.
* * *
Suma pa sa tsismis -- kun tsismis man gayud kini -- si P-Noy naglingawlingaw didto Manila uban sa mga artista. Suma pa sa usa ka komentaryo sa radio, si P-Noy nag sayaw-sayaw ug nagkanta-kanta samtang gatusan ang nangamatay sa baha didto sa Mindanao.
* * *
Kining maong tsismis -- kun tsismis man ugaling -- mipabalik sa panumduman sa mga tawo ang matang sa pagka Pangulo ni anhing Ramon Magsaysay kung itandi kang P-Noy.
* * *
Dihay estorya nga usa ka kaadlawon niana, si Monching (angga ni Magsaysay) nakadungog sa radyo nga dunay dakong sunog sa usa ka dapit sa Manila. Sa way pupanagana nidrayeb kini sa iyang personal nga jeep padung sa dapit sa sunog. Nakita sa mga hulagway sa mantalaan si Monching kinsa nagpajama pa naggunit sa fire hose uban sa mga bombero.
* * *
Tinuod man kini o dili, mao kining estorya sa tibuok Manila -- kapihan, barberya, aseras, baligyaa’g isda sa merkado, etc. Daghan ang mituo niini kay diha may hulagway sa mga mantalaan.
* * *
Balita kagahapon nagkanayon nga gipanghimakak ni P-Noy ang tsismis diin ang tinubdan mao ang usa ka artistang babaye. Leksiyon na kini alang ni P-Noy sa dili pagsagol-sagol sa mga artista sa mga party-party diin ang tsismis maoy ilang way of life.
* * *
TRIVIA -- Tabangan ta ang mga kaigsuonan ta nga nabiktima sa dakong katalagman didto sa Cagayan de Oro ug Iligan. Ang The Freeman ug Banat News milusad og fund raising alang sa mga biktima sa bagyo ug baha sa maong mga dapit.