Darating ang Pasko – nais ko’y magsaya
Subali’t puso ko’y sakbibi ng dusa;
Maagang yumao mabait kong ama’t
Sa kanya’y sumunod uliran kong ina!
Ang sabi ni ina nang buhay si ama –
Siya’y katiwala ng mayamang donya;
Malaking lupaing pamana sa kanya
Nang kami’y mag-aral naipagbili na!
Uliran kong ina’y masarap magluto –
Dinala sa langit gusto kong adobo;
Sa kanyang paglisan nalumbay ang puso
Di na matitikman – bibingka at puto!
Saka ang diwatang pinaka-iibig
Ay biglang nagtampo di alam kung bakit?
Kapiling nga siya ang ngiti’y kay pait
Ligayang hangad ko’y waring panaginip!
Mga kaibigang dati ay kalimpi
Doon sa high school at elementary –
Hindi na dumalo sa aming jubilee
Marami’y may sakit ang iba’y nasawi!
Noo’y pinangarap masayang pamilya
Sa araw ng Pasko kami’y sama-sama;
Subali’t wala na sina ama’t ina
At ang limang brothers ay nagsipanaw na!
Dadalwa na kaming ngayo’y nabubuhay –
Ako at si ate’ng nasa nayon naman;
Kaya anong saya ang mararanasan
At sa Paskong ito’y aking hinihintay?
Ano nga ang Paskong sa aki’y darating
Ang hatid sa puso ay luksang damdamin?
Ang kaligayahang dati’y aking akin
malamig na dampi ng Disyembre’ng hangin!
Kaya ang ligayang dapat kong asahan –
Sa araw ng Pasko ay kapayapaan
Saka ang hustisya sana ay makamtan –
Ng mga pinatay na newsmen. sibilyan!