Gimando na sa Regional Trial Court sa Pasay City ang pagbalhin ni kanhi presidente Gloria Macapagal Arroyo didto sa Veterans Medical Center, ang samang tambalanan diin gipaubos sa hospital arrest kaniadto si kanhi presidente Joseph Estrada.
Ang korte mihatag sa kampo ni Arroyo og lima ka adlaw aron hingpit nga makabalhin gikan sa St. Luke’s Medical Center sa Taguig. Nakit-an sa korte nga ang Veterans hospital maoy labing haum nga government hospital alang ni Arroyo tungod kay kumpleto kini sa kahimanan ug maayo ang seguridad.
Ang mando sa korte nigawas taliwa sa pangangkon sa kampo ni Arroyo, pinaagi sa tigpamaba niini nga si Elena Bautista Horn, nga dunay plano ang administrasyong Aquino pagpatay sa kanhi presidente.
Si Horn mipublikar sa giingong “OPLAN: Put the Little Girl to Sleep.” Sumala pa ni Horn dunay kasaligang tinubdan ang ilang kampo gikan sa usa sa mga ahensiya sa gobyerno nga mitug-an sa giingong plano pagpatay sa kanhi presidente. Ang maong kasayuran maoy usa sa mga hinungdan nga hugot nilang gisupak ang pagbalhin kang Arroyo sa Veterans hospital.
Matud ni Horn nga nabalaka sila nga hilo-an si Arroyo didto sa Veterans hospital. Pero kinsa may motuo niining maong pangangkon nga klarong propaganda aron kumbinsihon ang korte nga angayan siyang ipabilin sa St Luke’s Medical Center o ba kaha tugotan nga ipaubos sa house arrest.
Tataw nga gamiton nila nga argumento ang giingong hulga sa kinabuhi ni Arroyo aron iduso ang ilang gusto asa prisoha ang kanhi presidente. Pero dili na nila mailad ang publiko. Way rason nganong tinguhaon sa gobyerno ang pagpatay ni Arroyo labi pa karon nga duna na siyay kaso ug maisip na gani nga binilanggo. Unsa may makuha ni Aquino kun iyang ipapatay si Arroyo?
Ang sama ni Arroyo nga labihan ka “unpopular” dili na maisip nga hulga sa gobyerno ni Aquino busa bisan unsaon og timbang-timbang di gyud katuohan ang pangangkon sa kampo sa kanhi presidente.
Naglibog lang ko nganong migamit ang kampo ni Arroyo sa ingon niining way hinungdan nga gimik aron lang ituboy ang ilang gusto nga mapaubos siya sa house arrest. Ngilngig ug pulos mga maayong laki ang mga abogado ni Arroyo busa wala na sila magkinahanglan og barato nga gimik aron lang pagsuporta sa ilang argumento.
Bisan dili sila magmugna og estorya dako baya og purohan nga makab-ot nila ang gusto nga house arrest tungod kay duna na kini’y precedent sa kaso ni Estrada. Dunay prinsipyo sa balaud nga gitawag sa pinulongang latin “stare decisis.”
Matud sa mga abogado nga buot ipasabot obligado niini ang lower court pagsubay sa desisyon nga gihimo sa usa ka superior court. Busa kun ang Sandiganbayan nga superior court sa RTC mitugot niadto og house arrest kang Estrada dako sab ang kahigayonan nga tugotan si Arroyo sa Pasay City RTC pinasikad sa prinsipyo sa “stare decisis.”
* * *