Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Gipabalik na sa kagamhanan sa dakbayan sa Sugbo ang mga gikan sa dakbayan sa Mandaue nga makasulod sa dalan Manalili paingon sa atubangan sa simbahan sa Cathedral nga gidid-an sa pagpasulod sa milabay’ng pipila ka bulan nga nakaingon sa pagreklamo dili lang sa mga drayber sa maong mga sakyanan kun dili lakip na sa mga sumasakay.
Nunot usab sa mga lakang sa pagsabotsabot nga gihimo sa mga opisyal sa duha ka dakbayan nga maoy ilang nakab-ot ang pagbalik sa maong kahigayonan nga gihikaw sa kagamhanan sa dakbayan sa Sugbo isip pagpatuman sa ilang ordinansa nga maoy gihimong hanig nga katarungan.
Sa maong paghatag og balik sa pagsulod sa maong mga sakyanang pasaheroan gikan sa dakbayan sa Mandaue adunay mga giluwatang pahimangno ang mga opisyal sa kagamhanan sa dakbayan sa Mandaue ngadto sa hingtungdan nga mga PUJ drayber nga likayan gayod ang paghimo og mga abuso.
Samtang daghan sa mga PUJ drayber nga mainampingon sa ilang pagmaneho og sakyanan ug nagtuman sa mga lagda nga gilatid sa kadalanan dili usab ikalimod nga daghan kanila ang mga abusado.
Naglakip sa ilang abuso sa panahon sa ilang pagbiyahe mao ang pagpataka lang og hunong sa gimaneho nilang sakyanan nga makaingon na hinuon sa pagkabara sa dalan.
Magpataka lang og parking alang sa pagpaabot og pasahero ug himoon na lamang nga terminal ang daplin sa kadalanan nga makaingon sa pagreklamo sa uban nga mga tawo nga malangan na hinuon sa ilang pagbiyahe.
Adunay mga PUJ drayber ilabi na sa panahon sa gabii ug kaadlawon hilabihan ka kusog nga mopadagan nga makapatumaw sa katahap murag naggamit og ginadiling drugas nga mosangko na hinuon sa aksidente.
Ang uban kanila dili hinuon tanan nga mga drayber sa PUJ, mo-trip cutting sa ilang pagbiyahe sama sa kutob na lang sa highway sa dakbayan sa Mandaue ilang pakanaugon ang mga pasahero sanglit magdali og balik sa dakbayan sa Sugbo kay daghan pa nga nagpaabot nga mga pasahero.
Kining maong matang sa mga drayber nga abusado mao unta ang angayan nga kuhaan sa ilang lisensiya sa mga traffic enforcer hangtod nga mahurot ang maong matang sa kinaiya ug aron sa ingon maoy mahibilin kadtong mga drayber nga mga tarong ug mainampingon kanunay sa ilang pagbiyahe.