Kun wa nay motuo sa pamilyang Arroyo nga mobalik sila dinhi sa Pilipinas kun matugotang makagawas sa nasud aron magpatambal, di ang Department of Justice o ba kaha si Presidente Aquino maoy angayan nilang basulon.
Ang ilang kaugalingon maoy angayan nilang pangutan-on nganong way salig ang gobyerno nila.
Kay tinuod lisud gyud isalig sa usa ka tawong bakakon. Si kanhi presidente Gloria Arroyo lantaran sa iyang pagpamakak kaniadtong siya misaad nga dili molansar pagkapresidente atol sa 2004 elections.
Karong bag-o taliwa sa mga pagduda nga mosibat ang pamilyang Arroyo paingon sa Dominican Republic ug mangayo og political asylum sa higayon nga sila tugotan nga makabiyahe sa gawas aron sa pagpatambal, si Mike Arroyo kusganong nanghimakak.
Matud niya nga wa niy basihanan tungod kay sumala pa niya wala pa sila sukad masukad makatunob sa maong nasud sa Carribean.
Dinhi nabisto na sab ang ilang kabakakon tungod kay sigun sa hulad sa mantalaan didto sa maong nasud niduaw diay ang kanhi presidente niadtong Mayo 4 aron pagdawat sa labing taas nga pasidungog gikan sa presidente sa Dominican Republic.
Gani gimantala ang hulagway ni Arroyo ug sa presidente sa Dominican Republic atol sa pagdawat sa pasidungog.
Human mabuking, ang mga turotot sa mga Arroyo mao nay nidepensa ug miingon nga si GMA ray didto ug wa masayod ang iyang bana.
Pastilan, kinsa may ilang gitunto? Unsa man diay nga klase ang panagtiayon sa mga Arroyo nga mibiyahe ang asawa apan wala masayod ang bana og hain mopaingon ang iyang asawa? Pag-ingnun pa, Estoryaheeeeee.
Tungod sa nabisto nga pagduaw ni Arroyo sa Dominican Republic ug sa kasuod diay nila sa presidente sa maong nasud dili layo nga mahitabo ang gikabalak-an nga makakuha sila og political asylum bisan kun dili angayan sanglit di man sila biktima og political persecution dinhi sa Pilipinas.
Kun duna may mga kaso nga nag-ong-ong batok nila dili ni persecution kun dili simple lang nga pagpatuman sa atong balaud.
Ang nakalingaw lang kay bisan ang mga molupyo sa Dominican Republic dili gusto modawat nila.
Ang mga kumentaryo sa taga Dominican Republic nga napublikar online sa mantalaang Dominican Republic Today nagpakita nga dili welcome ang mga Arroyo didto.
Gani usa sa mga kumentaryo nangutana og unsay tuyo ni Arroyo sa ilang nasud, mokuha ba kuno og masteral sa pagpangawat?
Laing kumentaryo nagkanayon kun moadto ba siya aron tudloan ang ilang presidente.
Diha say nitubag nga wala na kinahanglana kay nabulit sab diay sa pasangil sa korupsiyon ang presidente sa maong nasud.
Gani, sigun sa mga on line reaction, giingon nga suod sa durugista ang ilang pangulo.
* * *