Kasagaran natong madunggan nga sa matag higayon nga mohimo kita og maayo moingon man dayon kita nga kini usa ka obligasyon nga gilatid diha sa Balaod nga angayan natong higugmaon ang Dios ug higugmaon nato ang atong isigkatawo sama sa atong paghigugma sa atong kaugalingon. Apan mahimo man usab nga ato kining tan-awon nga usa ka kahigayonan nga mag-abli sa mga daghang posibilidad. Sa higayon nga kini ang imong dagan sa imong hunahuna ug pagbati, nahimong mas gaan alang kanimo ang pagbuhat og maayo kini tungod kay wala ka man pugsa ni hurawa sa bisan unsang balaod. Ug kun imo kining himoon, makita nimo nga dunay kahulogan ang imong gibuhat ug sa ingon, kontento ka.