Gisagpa kuno sa traffic enforcer ang usa ka drayber og PUJ nga wala motuman sa lagda nga gilatid sulod sa Capitol Compound kaniadtong miaging adlaw. Dili usab hinoon maayo ang gihimo sa enforcer.
Kun makasala ang drayber hala sakmita ang iyang lisensya ug itumbok ang kalapasan nga iyang nahimo, apan ang pagsagpa dili mahimo. Bisan pa og ang drayber dili mohatag sa iyang lisensya sa imong pag-demand, himoi og lahi nga pamaagi.
Unya, kamo usab nga mga drayber, kini maoy hinumdumi. Kanang lisensya nga giisyu kaninyo sa Land Transportation Office (LTO), dili kana inyo ug iya kana sa kagamhanan nga mahimong sakmiton sa mga LTO personnel ug deputized agents bisan unsang orasa kun makahimo kamo’g sayop.
Gilatid sa kasabutan sa mga opisyal sa Kapitolyo ug City Traffic Operations Management (CITOM) nga pwede’ng paagian sa mga sakyanan ang access road diha sa Capitol compound paingon sa M. Velez karon nga gihimo na nga “One Way” ang Don Gil Garcia Street, apan ubos sa kondisyon.
Walay drayber sa mga PUJ nga tugotan nga mohunong sulod sa compound aron pagpasakay ug pagpakanaug og pasahero. Mao kini ang rason nga si Rogel Dinaguit gipangayoan sa iyang lisensya ni traffic enforcer Imelda Sabellano.
Apan nagbagulbol si Dinaguit. Ayaw anang batasana Dinaguit. Ang tukma nimo nga buhaton unta mao ang paghatag sa imong lisensya usa ka mangatarungan. Kun ako pa ang nakasakop nimo, dili man ko managpa, apan mas daku ang imong mabayrang multa.
Gilatid sa Section 19, Chapter III, sa Republic Act 4136 kinahanglang mopakita ug mohatag ang drayber sa iyang lisensya kun ang LTO personnel o deputized agents mangayo niini kanila.
“The license shall be carried by the driver at all times when operating a motor vehicle, and shall be shown and/or surrendered for cause and upon demand to any person with authority to confiscate the same.”
Timan-i nga mahimong tan-awon sa mga LTO agents ang lisensya sa mga drayber bisan pa og wala ka makahimo’g sayop sa imong pagmaneho’g sakyanan kay kabahin kini sa pagpatuman sa lagda nga ang maka-drive og motor vehicle kadto ra’ng dunay driver’s license.
Gilatid sa samang lagda “It shall be unlawful for any person to operate any motor vehicle without having in his possession a valid driver’s license to drive a motor vehicle.”
Sa laktud, ikaw Dinaguit, kun pangayoan ka’g lisensya sa mga traffic enforcers, ayaw pagreklamo, ihatag dayon. Kun ang CITOM enforcer nga midakop nimo dili deputized sa LTO dili man usab sakmiton ang imong lisensya.
Nasabtan na nimo? Unya, ikaw usab Enforcer Sabellano, kalma lang. Ayaw panamparos kun tinuod man ang pasangil. Ang imong buhaton ibutang diha sa TOP ang kalapasan sa maong drayber.
Basi sa pasiunang inpormasyon, ang nahimong sayop ni Dinaguit mao ang “reckless driving for disregarding traffic signs” nga nagtangag og P1,078 nga multa. Kun gusto ka pa og dugang silot, tan-awa kay basin nag-sinelas, lain na usab nga kapin sa libo nga multahan.
Ako kadaghan na makasugat og mga drayber nga magpasuko-suko pero dili g’yud ko masuko, hinoon mosamot nga sakmiton nako ang ilang lisensya ug daghan siya’g multahan.
Mao na nga isip leksyon, kamong mga drayber pagbinuotan lang gud, dili ba wala g’yuy modakop ninyo.