Agi og depensa sa ilang pagpahimulos sa kwarta sa katawhan, ang konsehal nga maoy nangamahan sa resolution nga nagtugot sa 20 ka mga opisyal sa dakbayan nga mo enrol og fitness program sud sa mahalon nga gym miingon nga igo lang siyang nagtuman sa memorandum sa civil service commission nga nagmando nga kinahanglang duna gyu’y igahin nga oras alang sa exercise sa mga kawani sa gobyerno.
Matud ni konsehal Joey Daluz nga ang CSC nagmando nila nga kinahanglan sila og oras alang sa exercise.
Iya sab nga gihimakak nga ilang gipaburot ang kantidad sa ilang workout plan didto sa Holiday Gym and Spa.
Sumala pa niya nga ang P12,500 kuno nga annual membership alang kuno ni sa mga batan-on.
Wala ko kasabot og angayan ba kong magpasalamat ni Daluz tungod kay sa ato pa batan-on pa diay tingali ko sa tan-aw sa staff sa gym nga akong gipangutana. O ba kaha gibuangan lang gyud si Daluz sa mga Sugboanon.
Di na ko makiglalis niya sa isyu sa overpricing tungod kay ako nang gihatag ang kwentada nganong overpriced ang maong transaksiyon sa milabay nako nga lindog.
Ari ta sa iyang giingon nga gimando kuno sa CSC nga sila mag exercise. Pastilan, abogado man unta si konsehal Daluz pero maayo pa may estambay sa kalye tingali duna pay sentido kumon.
Akong pangutana nimo konsehal, gimando ba sa CSC nga inyong gastohon ang kwarta sa mga magbubuhis alang sa inyong exercise?
Ikaduha, niingon ba ang CSC nga adto gyud mo sa mahalon nga gym mag-ehersisyo?
Ikatulo, ang memorandum nag-ingon man kaha nga tanang kawani sa gobyerno ang mag-ehersisyo, nganong kamo raman ang mipa-enrol didto sa Holiday Gym and Spa?
Nganong wa may bisan usa ka department head o kawani sa City Hall nga inyong giapil?
Ang tinuod mapahimuslanon lang gyud mo sa inyong pwesto. Mahimo man unta mong mag-ehersisyo sa Sports Center pero nganong didto man gyud sa Holiday?
Ang tubag tataw tungod kay dunay nakakwarta sa transaksiyon nga inyong gipaburot.
* * *