Matag usa buot mamahimong hingpit sa bisan unsang natad sa kinabuhi. Ug gani, ang isyu sa kahingpitan mao man ang nahimong usa sa mga sentro sa Espirituhanong kalibutan. Apan ang pangutana sa unsa mang paagi gyud kita mahingpit? Realistic ba gyud kini nga panlimbasog? O usa lang ba kaha kini ka ideyalismo ni bisan kinsang tawo.
Dunay mga tawo nga dili maantigong modawat sa ilang kapakyasan. Usa niana ka higayon nitan-aw ko sa teleserye nga nag-ulohan og BUDOY. Tulukibon kaayo ang giluwatang pamahayag ni Tirso Cruz III ngadto sa iyang amigo nga iyang gihangyo nga pangitaon ang nawala niyang anak sulod na sa 17 ka tuig. Siya nagkanayon: “Tama ka, hindi ako tumanggap ng pagkatalo lalong lalo na sa pamilya ko!” Apan bisan pa man sa iyang kabatid sa medisina nahimong usa ka timaan sa kapakyasan ang iya mismong anak nga si Budoy (Gerald Anderson).
Ang kahingpitan ang atong tan-awon ingon nga dili hawa sa reyalidad. Angayan lamang nga atong dawaton nga dunay limitasyon ang tanan. Ang pagdawat sa limitasyon maoy makapahimo sa usa ka tawo nga makontento sa bisan unsa nga anaa kaniya. Ang tawong kontento ang andam sa kanunay nga moabli sa iyang kaugalingon alang sa mga bag-ong pagtulon-an sa kinabuhi. Kay ang tawo tawong dili abli ug nagtuo nga hingpit na ang sama sa usa ka baso nga kanunay’ng maawasan sa tubig nga ibubo kaniya.