Makapa-alarma na kaayo karon ang dagan sa utok sa mga drug addict tungod kay di na mahadlok mounay pagpatay sa ilang mga ginikanan.
Nagpakita lamang nga nahimo nang trend o uso karon nga kutob sa inahan ug amahan nga babaon o yawyawan di na pasayloon sa ilang anak nga adis-adis.
Ang tanan nasayud nga way normal nga inahan ug amahan nga igo lang mongisi ug magpakahilom kun magpabadlong ang anak, kay kinaiya gayud sa mga ginikanan nga mokasaba, moyawyaw ngadto sa anak kun kini magpabadlong na.
Kini usa ka katungod sa amahan ug inahan tungod kay di sila gustong matumpawak sa kaalaotan ang ilang anak.
Busa di angay basulon sa anak kun ang iyang inahan o amahan mokasaba o moyawyaw kaniya sa higayong makasala siya.
Ang angay niyang basulon mao ang iyang kaugalingon nganong nagpakabuang siya sa gidiling drugas nga unta mga tawo ra mang barumbado ug wa maghunahuna sa iyang maayong kaugmaon ang nagpakabuang niini.
Sa mga ginikanan usab nga nakabaton og anak nga adis-adis, mao kini panahon nga himuong leksyon sa usa ka ginikanan nga ang pagpanganak, pa-suwerte lang, kun makaanak ka og buotan suwerte kaayo kang ginikanana ka.
Pero kun makaanak ka og adis-adis, puwerting dimalasa nimo ilabi na kun hunosan kana sa kinabuhi niini.
Ang gidiling drugas di na masanta tungod kay wa nay gahum sa tawo nga makabaraw pa niini.
Kun maoy laraw sa usa ka magtiayon nga magpatuyang sa pagpanganak aron di masuko ang Ginoo, pag-ampo lang nga suwertion ka sa pagpanganak.
Kay kun dimalason ka sigurado nga di ka mamatay sa natural nga kamatayon kay imo rang anak ang mounay og ihaw kanimo. Di ba?