Kun may minilyon ka pesos nga mga welcome gift, send off gift ug uban pang gift, gift ang mga opisyal sa military, di sab bintahaan ang kapolisan sa nasud kinsa may helicopter nga segunda mano gihimong brand new ug may 28 ka mga armored personnel carrier nga gipaayo nga gigastuha’g minilyon usab ka pesos.
Mao ni klase sa mga opisyal sa atong kagamhanan nga maayong pakpakan tungod sa pagpalabwanay nila sa abilidad kinsay maayong laki nga mowaldas sa kuwarta sa gobyerno.
Puwerting luoya sa mga kabus, kay gawas nga gisugo pang padaghanon sa anak, napiskan man gani sa buhis nga hiniposan sa kagamhanan, apan gamitoy nalang kaayo.
Pipila niini mao ang nakahimus sa programang pantawid sa gobyerno karon, o kaha masunogan ug mabahaan una pa makatilaw og sardinas ug bugas nga tagpila ra intawon ka kilo.
Sa mga politiko nga pinili sa katawhan naa say mga maldito apan sekreto ra ang panapi gikan sa kuwarta sa panudlanan sa kagamhanan .
Lahi sa nadiskobrehang binuang sa mga kadagkoan sa militar ug sa kapolisan nga binulto kaayo ug gituohang ubay-ubay kanila ang nabulahan.
Ang mga tawong susama kanila maoy maayong padasigon nga manganak og daghan kay segurado gyud nga bisag kapila na madugta ang ilang kabukogan ilawom sa yuta di matun-as ang ilang katigayonan nga ikabilin nila bisan hangtod pa sa mga apo sa ilang mga apo.
Si kanhi Presidente Marcos kinsa giila kaniadtong bangiitan ug mangtas nga mikiriw sa katigayonan sa nasud nalupigan sa bag-ong henerasyon sa mga kawatan.
Daghan kaayong nakulbaan nga kun ang Amerika nga giilang labing datu nga nasud ug way kawatang mga opisyal, nakasinati karon og pagkabangkarota, ang Pilipinas pa kaha? Di ba?