Layo pa kaayo ang eleksiyon, apan sa sige na nako’g tuyoktuyok sa bag-ong pinuy-anang lungsod sa Minglanilla atol sa kapistahan sa Parokya sa Putling Kasingkasing ni Maria (Immaculate Heart of Mary Parish), nahibaw-an nako kun unsa unya ka-alegre ang eleksiyon sa 2013 kun ang nailhan nakong mga personalidad magdungan sa pagpanagan pagka-mayor.
Si Mayor Eduardo Selma anaa na sa katapusang termino karon. Ang iyang bise mayor nga si Lani Peña maoy gihugonhugonan nga modagan pagka-mayor tungod sa pagduso sa pamilyang Peña sa Minglanilla.
Apan magpalupig usab diay ang anak ni Mayor Eddie nga si Konsehal Jojo Selma? Sa dihang gipangutana sa amigo nakong pari si Konsehal Jojo, mibalibad intawon kini kay sumala pa niya, aduna sila’y grupo nga kinahanglang maoy modesider.
Sumala pa ni Konsehal Jojo nga mas taas kaniya si Bise Mayor Peña ug kun modesider ang grupo nga si Peña ang padaganon pagka-mayor, mag-agad siya sa grupo. Nakadayeg ko ni Konsehal Jojo tungod sa iyang “unselfish” nga karakter isip batan-ong politiko.
Tiaw mo na, mahimo ra kaayong hunghongan ni Jojo ang iyang amahan nga mayor nga siyay bendisyonan sa grupo sa 2013. Apan klaro sa iyang mga tubag ngadto sa pari nga ang grupo maoy iyang agdon.
Apan alang kanako, ang dakong tingog nga makapa-usab sa kamada sa politika sa Minglanilla mao si Kongresista Eduardo Gullas. Pananglit moingon si Edigul, si Jojo ang padaganon pagka-mayor sa Minglanilla, aduna kahay mahimo si Jojo ug Peña sa iyang desisyon?
Nasayod naman ang mga taga-first district nga si Ediegul maoy nasayod kinsa ang angay nga tawo sa sakto nga puwesto.
Nagtuo usab ko nga sa katapusan, ang amahan nga mayor adto mobendisyon sa iyang anak.
Sa akong nahibaw-an, “mayor” na ang tawag sa mga konsehal ug mga kapitan ngadto ni Jojo. Unsa may pasabot niini?
Kun anaa ang mayoriya (kun dili man tanan) nga mga konsehal ngadto ni Jojo, unsa pa may grupo nga hisgutan.
Tinuod nga si Mayor Eddie dili maka-itsa-puera ni Peña tungod sa kadako niini og tabang sa iyang administrasyon, apan alang kanako, wala may mawala ni Peña kun mo-slidedown lang una siya pagka-konsehal sa 2013 ug mobalik lamang siya pagka-bise mayor sa 2016.
Apan matud pa sa ubang Minglanillahanon nga nagsunod sa dagan sa politika sa lugar nga kun ang tingog sa amahan ni Bise Mayor Peña ang sundon, posibleng mapugos kini og dagan pagka-mayor. Kana kun mosugot usab ang buotan nga kapikas niini.
Gawas ni Peña, mitumaw ang ngalan ni Atty. Linette Geonson nga gituboy usab sa pipila ka mga lider sa lungsod pagka-mayor. Laing suliran nga sagubangon ni Jojo sa 2013 mao ang iyang uyoan ug ig-agaw nga posible usab nga managan pagka-mayor sa Minglanilla.
Si Boy Selma kaniadto pa nagpunay og atbang sa igsuon niining si Mayor Eddie. Karon nga si Jojo na ang modagan pagka-mayor, moundang na kaha kini og dagan?
Laing Selma nga gituboy usab sa pipila ka grupo si Jun Selma, igsuon sa philantrophist nga si Lumen Selma-Cañedo. Apan sa akong nasayran, mas hilig niining habig sa mga Selma ang pagtabang sa mga tawong nanginahanglan kay sa pag-apil-apil sa politika.
Gani, sa akong tan-aw niining Lumen, mas malipay siya nga kanunay’ng nagtabang sa mga tawo nga way sukli nga gipaabot.
Sa wala masayod, si Lumen nag-alagad sa simbahan sa Minglanilla sama sa iyang inahan nga walay puas ang pagserbisyo sa mga tawo pinaagi sa parokya.
Gani, si Lumen ug iyang anak nga si Jigger Cañedo nalambigit niining “agro-tourism project” sa barangay Cadulawan, bukiran sa Minglanilla pinaagi sa pagtabang sa mga mag-uuma nga benepisyaryo sa 54 hektaryas nga luna nga gi-award ubos sa Comprehensive Agrarian Reform Program.
Adunahan kining pamilyaha, apan wala silay puas sa pagsaka sa barangay Cadulawan aron pakigkitaan si Kapitan Boboi Geonson ug mga lider sa mga mag-uuma aron tukion ang mga kalambuan nga himuon nga gitumong sa pagpalambo sa pagkinabuhi sa mga mag-uuma sa lugar.
Kining proyektoha gi-adopt sa Rotary Club of Cebu – Minglanilla nga gipanguluhan ni Jigger Cañedo, ug inabagan sa parokya sa Immaculate Heart of Mary pinaagi ni Fr. Jojo Deligero ug sa kagamhanan sa lungsod sa Minglanilla ug sa barangay Cadulawan pinaagi ni Kapitan Geonson.
Plano niini ang paghimong sentro sa turismo sa barangay Cadulawan diin ang mga turista molaag sa lugar kang kansang mga talan-awon mao ang pagpananom sa mga mag-uuma ug mga produkto sa mga mag-uuma sama sa mga lagutmon, prutas, utanon ug gatas sa kanding.