Walay they lived happily ever after. Mao kini ang tukmang paghulagway sa kinabuhi nato karon bisan pa man gani sa natad sa pakigrelasyon. Ang tanan dunay kausaban ug bugtong kausaban lamang ang maisip natong permanente ning kalibutana. Bugtong ang gugma sa Dios lamang ang magpabiling tiunay ug dili ang sa tawo. Kay ang tawo lagi, pul-anon, mapahimuslanon, o dili ba kaha maluibon. Sa kasamtangan, maayo ug mahinungdanon ka lang kun ikaw mapuslan ug sila nga nagpalibot kanimo dunay mapaabot. Apan kun wala ambot lang kaha kun ikaw lingion nila aron timbayaon ug hatagan og usa ka linain nga pagtagad. Kaluha sa kinabuhi ang dili makiangayong sistema.
Bisan pa man kun dili fairytale ang kinabuhi, padayon lang gihapon kitang manlimbasog, maningkamot, magpakabuhi kay kini man ang hinungdan kun nganong kita gipahimugso. Aron kita mabuhi. Dili fairytale ang kinabuhi apan ang Dios sa kanunay nagpasalig nga dunay kinabuhi nga happily ever after.