CEBU, Philippines - Ang mahal nga patron sa dakbayan sa Sugbo nga si Sr. Sto. Niño dugay na nga nahimong tipik ug kabahin sa banay'ng Manguilimotan sa Bonbon ug Angilan, Aloguinsan sukad pa sa apohan sa akong inahan nga si Tatang Eusebio. Hangtod nga ang pagbalaan ug pagsimba sa Balaang Bata gisawo sa akong apohan nga si Potenciano. Gikan kang tatay Poten gisawo kini ni tiyo Artemio, kanhi DepEd supervisor sa Carcar, Pinamungajan ug Aloguinsan, Cebu.
Matahom kaayo ang kapilya sa Sr. Sto. Niño nga anaa mahimutang sa nataran sa duha ka andana nga balay ni Tiyo Temio. Ang tinuig nga pangilin ni Sr. Sto. Niño ipahigayon sa ikatulong Domingo sa Mayo.
Sa sinugdan giamot-amotan sa siyam ka mga anak ni tatay Poten ang gastohan sa piyesta sa matag tuig. Apan, nadugay gisolo kini paggasto ni Gaw Leo, tag-iya sa mokapin sa 20 ka Arbees bakeshops.
Si Gaw Leo ikaduhang anak ni tiyo Temio nga manghod ni mama Felou. Gatosan ang mamista sa ilang tiyo Temio sa matag bulan sa Mayo dili kay dako og hikay si Gaw Leo nga may dakong piggery sa Bonbon kun dili nasayod na sila kun unsa ka milagroso ang Balaang Bata. Gani, ang Sr. Sto. Niño mao gayod ang mahal nga patron sa Bonbon, Aloguinsan gumikan sa pagkamilagroso niini.
Ang Bonbon magsaulog sa iyang tinuig nga pangilin matag ikatulong Sabado sa Septiyembre. Ang mga sakop sa banay'ng Manguilimotan nga may gidaghanon nga 5,000 ka tawo kapin o kulang sa tibuok Aloguinsan, Asturias, Calatrava, Negros Occidental ug sa ubang bahin sa Kabisay-an ug Mindanao.
Ang mga sakop sa maong banay misulti nga si Sr. Sto. Niño miluwas sa ilang mga sakitsakit, mga katalagman sa ilang dapit ug mga pagsulay sa mokapin sa usa ka siglo. Daghan usab nga nagtuo nga ang kalamposan ni Gaw Leo sa iyang negosyo sa bakery nagumikan sa panalangin sa Balaang Bata. Ang pamilya ni Gaw Leo nahibaw-an usab sa tibuok Aloguinsan nga dagko og amot sa simbahan. Pit Senyor!