Dako ang gigahing salapi sa kagamhanan alang sa mga modernong kahimaman sa gubat sa mga sundawo sa nasud.
Kining P49 bilyones, kun ikahapak gyud kini sa husto ug kalidad nga mga kahimanan, aw di tiaw ang mga kahimanan sa gubat sa mga sundawong Pilipino.
Kini makasukol na gyud kun makigkombati ang Pilipinas bisan sa mga dagkong nasud nga mosuway sa pagpanamastamas niini, ilabi na kun suwayan pag-ilog sa China ang mga isla sa Pilipinas nga anaa sa Spratly.
Ang suliran sa Spratly , usa sa nakapaaghat sa kagamhanan sa paggahin og dakong salapi aron matubag ang gipangayo sa Philippine Air Force base sa gikuwenta niining gastohonon sa mga palitonong mga kahimanan sama sa eroplano, ug uban pang gikinahanglan sa dinagkong kombati.
Di man kini problema, kay ang tinuod kun hisgotan ang kahimanan sa gubat , mao kini garbo sa matag nasud nga kinahanglang ipasigwar sa tibuok kalibotan aron kadtong mga nasud nga buot modaogdaog kanila, sama kanato dinhi sa Pilipinas, magpanagana na ilabi na kun masud-ong nila nga ang mga sundawong Pilipino mosukol usab og pinanitay.
Ang nagkalainlaing nasud sa kalibotan, wa magpanuko sa pagmontar og modernong kahimanan sa gubat ug gigastohan sa dinagkong kantidad.
Pero usahay ang mga Pilipino di makalikay nga magduha-duha kay nakamatikod man gud sa kabilyako sa ubang mga opisyal sa kagamhanan gikan sa sibilyang mga opisyal hangtod sa military.
Mao usahay kun mabatian na gani ang binilyon nga gahin, alang sa mga kahimanan sa gubat ug uban pang gastohanan sa gobyerno, daghan kaayong kilay ang moinat uban ang mga pangutana, kun de kalidad ba gyud kaha ang mga kahimanang paliton ? o sub-standard, buwahan to makaginansya og dagko ang mga mangahente niini. Di ba?