Basi sa talaan sa Land Transportation Franchising and Regulatory Board dili mominus sa singko mil ka mga unit sa taxi ang nagdagan dinhi sa Sugbo.
Apan sa maong gidaghanon maihap lang sa tudlo ang buotan nga drayber. Pila lang nila kabuok ang mouli ug mga butang nga mahabilin sa ilang unit gikan sa ilang mga pasahero.
Sa miaging semana dihay drayber nga miuli sa pitaka nga nahabilin sa iyang pasahero.
Ang pitaka dunay sulod nga kapin sa P16 mil. Labihan kahinangop sa tag-iya nga giuli sa drayber ang kwarta tungod kay iya intawon ni nga pension sa SSS nga gitagana alang sa iyang mga tambal.
Ang drayber nga si Rogelio Jagopaas miangkong dako na unta kaayo og ikatabang sa iyang inadlaw nga panginahanglan ang maong kantidad apan wala siya masilaw niini.
Maoy iyang gipalabi nga mag-antos asa kutob ang lahutay sa P500 nga sagad niyang kita matag adlaw sa pagmaneho.
Apan subo nga palandungon nga ang mga maayong binuhatan sa mga drayber nga sama ni Jagopaas matabunan sa mga tulisan ug badlongon niyang mga kauban.
Maduhig intawon sa ratsada ang mga buotang drayber sama niya sa binuhatan sa ubay-ubay nga mga taxi draybers nga kun dili manulis sa ilang pasahero pinaagi sa pagpanglubag mamili og pasahero nga pasakyon.
Daghan nako nabalibari og taxi drayber. Sagad nilang rason dili sila mohatud kay sagkaon kon tungason ang among dapit.
Unsaon nga taga bukid man gud intawon ko, apan kun imong ingnun nga modugang lang ka sa patak sa metro labihan nila ka abtik. Ang rason nga dili makasaka ang ilang unit kalit lang mahikalimtan.
Sa miaging gabii laing taxi drayber ang mibalibad nako. Dili kuno siya mohatud kay tungason ug dili makasaka ang iyang sakyanan.
Wala na ko makiglalis sa drayber apan ang akong gihimo mao ang sekreto nga paglista sa pangalan sa taxi ug sa iyang body number. Akong gisumbong ni LTFRB director Ahmed Cuizon ang nahitabo ug iya ko nga gi-refer sa LTO.
Matud ni Director Cuizon way rason mobalibad ang mga drayber sa taxi og pasahero tungod kay dako ning kalapasan nga mamahimong rason aron kanselahon ang ilang lisensiya gihatag na sab ang usbaw sa pletihan nga ilang gipangayo.
Ang mga operators morason kaniadto nga mamili ang drayber tungod kay barato ang plete ug maalkansi sila sa abang. Apan karon matud ni Cuizon di na gyud makarason ang mga drayber. Dili ba mahimong gamiton nga rason nga dili makasaka tungod kay nagpasabot ni nga dili diay road worthy ang sakyanan nga iyang gimaneho busa angayan sab nga dakpon.
Mao nga alang sa drayber sa D'Gimikiro Taxi nga dunay body number 0981 pasensiya na apan tinud-on tika aron ka mahimong leksiyon sa uban nga mga drayber nga mga barumbado.
Salamat ni LTO Dir. Raul Aguilos nga personal nga midawat sa akong reklamo ug mipasalig nga ilang ipatawag ang drayber sa maong taxi unit.
* * *