Samtang ang simbahan nagtamod ug naghatag og bili sa kinabuhi labina gyod sa mga bata, dunay ubang bata nga nagpinutong mikutlo sa kaugalingon nilang kinabuhi pinaagi sa paghikog.
Niadtong bulan sa Abril usa ka bata ang nagpakamatay didto sa Minglanilla kay gikasab-an sa iyang inahan tungodkay gamay ang grado nga nakuha sa eskuwelahan. Karong bag-o, laing bata na usab ang naghikog kay wala makagusto sa eskuwelahan nga gipaenrolan sa iyang inahan. Nagbitay intawon siya sa sanga sa kahoy sa Pardo.
Ang bata mahadlok mamatay. Mahadlok gani nga masamad. Apan sa nahitabo sa duha ka bata, tataw nga mipasulabi sa ilang hunahuna ang kaputong, o kaha kahiubos. Nagtuo sila nga wala na silay bili sa ilang mga ginikanan.
Dili maayo kining maong timailhan. Delikado diay kun kasab-an nato ang atong anak, o kaha paeskuwelahon sa wala niya magustohi nga eskuwelahan. Magpinutong diay dayon ug modangop sa pagpakamatay. Angayan nga hatagan kini’g pagtagad sa mga ginikanan karon. Apan dili kita makahan-ok sa pagbasol sa mga ginikanan, kun mahitabo kini. Hinuon, panid-an sa mga ginikanan ang lihok ug kinaiya sa anak. Dasig ba siyang pagka bata, o hilumon ba? Delikado ang bata nga hilumon, nga dili gani makigdula sa iyang isig kabata. Kining matanga sa mentalidad ang daling maputong ug mahiubos. Sensitibo kaayo ang hunahuna sa tawo nga ingon niini. Dili kasultihan bisag tambag lang kay isipon nila nga gikasab-an sila.
Sumala sa libro nga akong nabasahan bahin sa panghunahuna sa bata, angay nga hatagan og igong panahon sa pagtagad ang anak nga nagbaton og kinaiyang hilumon. Ang mga ginikanan makigsulti kaniya, makigsandurot kaniya, mopakita og pagmahal kaniya. Kun duna siyay nabuhat nga dili maayo, dili siya kasab-an, hinuon tambagan lang siya. Sa laktod, hatagan og hustong panahon ang bata aron magdako siya nga nagtuo nga gimahal siya sa iyang mga ginikanan.
Dali rang mahiubos ang bata, dali ra silang maguol. Lagmit dili sila makasulti niini ngadto sa ilang mga ginikanan. Mas palabihon nila ang pagpakamatay sama sa gibuhat sa duha ka bata nga atong gihisgotan sa itaas. Mas makaayo sa bata nga dasigon siya sa pagpakigdula sa iyang isig ka bata kun wala siyay klase importante kaayo sa mentalidad sa bata nga malipayon siya. Ang bata nga ingon niini, magtubo siya nga himsog ang hunahuna. Gikinahanglan kini sa anak sa iyang pagdako aron masulod sa iyang hunahuna ang positibo nga panglantaw sa iyang kinabuhi ug kaugmaon.