Tawhanong kalibutan, kalibutanon nga tawo
Kasagaran makadungog kita ning rason; “Unsaon tawhanon ra man” mao nga nakasala. Kun maghisgot kita og tawhanong kalibutan kini nagpunting sa mga tawo nga sama kanato. Hinuon sabton nato ni sa aspeto sa pakiglambigit ingon nga mga tawong malambigiton. Ang tawhanong kalibutan mao kini ang kalambitan diin nahitabo ang pagbinayloay sa mga kaugalingon ngadto sa isigka-malambigiton. Sa ato pa, kita ang mga Kalibutanong tawo nga nahimong kabahin sa usa’g-usa segun sa paagi nga kita nakiglambigit.
Ning pagbinayloay ang tawhanong kalibutan ingon man ang kalibutanong tawo ang nagabitbit ning mosunod:
A.) Kaugalingong sugilanon nga niapekto sa personalidad ug pamatasan.
B.) Ang mga tawo nga nalambigit sa maong sugilanon.
C.) Ang mga lihok ug pagsanong nga nilangkob sa usa ka panlantaw o pamatasan.
Busa sa dili ka pa mohatag sa imong paghukom aninawa una kun nganong naglagot ka sa maong tawo nga imong gikahibalag. Basin baya kun ang maong reaksiyon nagasukad mismo sa imong kapakyas sa pagtugkad sa reyalidad sa imong kaugalingon.