Suwerte kaayo ang mga Pilipino nga nahaluna og maayong trabaho dinhi sa nasud ug labaw sa tanan ang mga dagkong opisyal sa gobiyerno nga puwerting dagkoa og suweldo.
Itandi sa mga kaliboan nga mga Pilipino nga walay suwerte sa panarbaho dinhi sa nasud busa nanglangyaw ngadto sa gawas pamasin nga adto sila makapag og suwerte.
Ang uban nga gidimalas gyud, namatay kay gibitay, ang uban nagtingkagol sa mga prisohan, dihang misugal sa ilang kinabuhi sa pagsalmot sa mga trabahong illegal aron mabuhi ug makapanginabuhi.
Adunay anaa sa mga nasud ilabi na sa Middle East nga nagkagubot ug nahimutang sa delikado ang ilang kahimtang, apan kasagaran kanila, mas palabihon pa nilang mapagan o kaha adto sila abti sa kamatayon didto kay sa mouli pa sila dinhi sa Pilipinas nga pulos lang kalisud ug kasubo ang ilang masinatian.
Para kanila mao ra og usa ka tawong may mananakod nga sakit ang Pilipinas nga angay nilang pahilay-an, malagmit gumikan sa kahiubos ug sa makapasubo kaayong dungog sa mga binuhatan sa mga opisyal sa gobiyerno dinhi.
Tinuod usab baya, kay hain ning labing debuenas ug gisuwerte kaayong mga Pilipino kay anaa sa tag-as nga puwesto sa gobiyerno mao man hinuoy labing kawatan sa buhis sa katawhan nga maoy nakapalisud sa kahimtang sa nasud.
Ang mga kabus nga trabahante sa mga buhatang pribado ug sa gobiyerno bisan gagmay kaayo og suweldo dinhi sa nasud, ug kadtong mga OFW nga bisan anaa sa peligrong mga dapit sa gawas, gidaginot gyud sa kagamhanan ang pagkobra sa ilang buhis aron ilawog lang ngadto sa mga hakog ug kawatan nga mga opisyal niini, di ba sakit kaayong palandungon?
Ambot lang kaha kun mosaler ba ang misyon sa administrasyon karon sa pagpuo ug paghunos sa kaisog sa mga kurapso nga mga opisyal niini gikan sa pagkawat sa buhis sa mga Pilipino.
Di kaha ni mahisama sa suliran sa ilegal nga drugas nga imbis, mobahar, misamot na hinuon ka kuyanap sa nagkalainlaing suok sa nasud? Di ba?