Niining henerasyon diin hapit tanang butang gipadagan na pinaagi sa computer, ang paghisgot sa mga butang nga imong matandi sa unang panahon nga mao pay paggitib sa sibilisasyon lisod nang hisabtan.
Kini tungod kay ang mao nay namat-an og buot ug kahayag sa kabatan-onan ang moderno nga mga kahimanan. Kun kaniadto budyong kon bayanan sa usa ka kinhason maoy gamiton pagtawag sa membro sa imong pamilya aron mopauli o ba kaha ang direktang pagsinggit nimo sa pangalan niini, karon dili na nimo kini mabati ug makita.
Gikan sa budyong ug uban pang klase sa tulonggon karon cellphone na maoy gigamit ang uban laptop computers inabagan sa moderno nga mga programa sa mga social networking sites.
Kun kaniadto kinahanglang baktason ang tagpila ka kilometro o ba kaha kabaw, kabayo, tartanilya, balsahan ug uban pa maoy transportasyon karon duna nay jeepneys, taxi, LRT ug daghan pa nga moderno nga mga sakyanan.
Tungod sa nagpadayong paglambo sa teknolohiya dili gyud ka maghuna-huna nga mobalik pa ang kanhiay’ng panahon nga magsakay ka’g balsahan.
Pero kun mahitabo ang gitinguha sa grupo sa mga environmentalist nga gipangulohan ni Atty. Antonio Oposa Jr. posibleng masaksihan sa modernong panahon ang moderno apan “primitive” nga matang sa transportasyon dinhi sa dakbayan.
Unsa kaha og dunay tren nga gama sa kawayan nga atong makit-an nga magdagan dinhi sa dakbayan sa Sugbo? Primitive kon karaan tan-awon tungod kay buhaton ni sa kawayan apan padaganon pinaagi sa moderno nga teknolohiya apan environment friendly tungod kay hangin ug init sa adlaw maoy gamiton pagpa-andar sa motor niini.
Ang sugyot ni Oposa mao nga magbuhat sila og prototype sa unang “Pedal-Solar-and-Wind powered mini train.”
Giawhag ni Oposa ang dakbayan nga maoy mogasto alang niini nga mokantidad lang og P150 mil apil na ang relis.
Padaganon kuno ang maong tren pinaagi sa “one horsepower motor”, baterya, ug duna poy pedal nga mamahimong gamiton sa mga pasahero nga gustong mag-exercise samtang luwan niini.
Ang tren dunay windshield nga magsilbi nga solar panel aron pagdakop sa kainit sa adlaw nga gamiton pagpa-andar sa motor ug dunay generator nga paandaron pinaagi sa hangin nga maoy mokarga sa baterya.
Ang suga nga gamiton mao ang Light Emitting Diode kon LED nga bombilya. Ang bongbong sa tren nga dunay 20 ka mga lingkuranan buhaton pinaagi sa amakan nga i-laminate gamit ang fiberglass ingon man usab ang sawog. Samtang ang atop, tulda maoy ilang gamiton.
Ma-imagine naba nimo unsay hitsura sa dakbayan kun kini nga matang sa public transportation maoy magdagan?
* * *