Tabunok kaayo sa mga simbolismo kun maghisgot kita og bukid o bungtod. Ang bukid o bungtod dapit diin anaa ang mga dios. Sa Mito ang bukid sa Olympus mao ang dapit diin nagpuyo si Zeus. Alang kanatong mga Kristohanon, ang Bukid sa Tabor mao ang bukid diin nahitabo ang mahimayaong pagkausab sa panagway sa atong Ginoo nga mao usab ang atong Ebanghelyo karong Domingoha. Sa maong bukid nakasinati ang pipila ka mga tinun-an sa patilaw nga kahimayaan nga padulngan usab nila ug nato sa tukmang panahon.
Sa maong hitabo, nitungha ang duha ka mga mahinungdanong personahe. Si Elias nga maoy representante sa mga propeta ug si Moises ang haligi sa balaod. Ang ilang presensiya naghulagway sa kalambigitan nga si Jesu-Kristo katumanan sa mga panagna sa mga propeta ug katumanan sa tanang mga balaod. Apan kuyog ning maong mahimayaong talan-awon ang kamatuoran sa kamatayon nga pagaagian niya tungod sa kamatayon sa krus. Ang Krus ingon nga eskandalo maoy simbolo sa kahimayaan kun moadto kita sa ebanghelyo ni San Juan. Kini kay ang Krus diin didto namatay ang Ginoo, didto usab niya gibuntog ang kamatayon.
Saka sa imong bukid karong mga panahona. Nga sa ato pa, paggahin og panahon sa usa ka mga mahilumong recollections ug retreats. Kun wala kay kahigayonan sa paghimo sa ingon, paningkamoti nga anaron mo ang paghilom bisan pipila ka gutlo matag adlaw. Diha lamang sa kahilom makita mo ang tinuod nga panghitabo sa imong kaugalingon. Diha sa kahilom ug kalinaw anaa ang Dios. Pagkaanindot niini sination dili ba?