Nagkagrabi man ang kahimtang sa mga panghitabo sa kalibotan karong mga panahona, gikan sa kamatay, kagutom, gubat sa nagkalainlaing dapit, mga linog ug uban pa , nga makapabalaka kaayo sa kadaghanan.
Mga kaguliyang nga mahimo untang kontrolahon sa tawo, sama sa kagubot sa Middle East ug uban pang gubat karon sa nagkalainlaing nasud sama sa Afghanistan ug uban pa, apan lisod makontrolar.
Apan may mga katalagman nga di gyud makontrolar og tawo sama sa mga linog ug uban pa.
Hinuon sa mga himasa og Biblia, di kaayo mabag-ohan niini kay nahisulat naman kini sa maong basahon.
May ubang mga libro nga mipatik niining mga butanga apan kinutlo lang gihapon gikan sa Biblia, sanglit ang Biblia mao ray libro nga orihinal nga gisuwatan ning mga hitaboa.
Husto bitaw tong tambag ni Cardinal Ricardo Vidal nga pabasahon gyud og Biblia ang tawo aron masayod sa mga panghitabo karon ug sa umaabot.
Kay mas bintaha tong mahibawo ka na sa taliabot nga mahitabo sa kalibotan pamasin nga makapanikaysikay ta sa pagpangita og kapaingnan sa higayong adunay moabot nga makuyaw nga panghitabo.
Suma sa Biblia , ang mga panghitabo karon, sisiw ra kaayo , nga buot ipasabot kaya kaayo sa tawo, bisan kun giingong mao kini timaan nga hapit na kuno mobalik si Cristo.
Ang labing kuyaw suma sa Biblia, mao kanang giingon nga inig-abot sa adlaw sa paghukom , wa kunoy maayong laki sa kalibotan nga di mokulisiw ug mopiliit sa kahadlok ug kakuyaw ilabi na sa hilabihang kainit sa siga sa kayo, ug bisan asa motago ang tawo, sa langit man ug sa ilawom sa yuta di makaikyas sa grabing kainit sa kayo unya wa ra ba kunoy kamatayon ang tawo nga maglangoy-langoy niini.
Ambot unsaon niini nga makaikyas ta niana, matud ra ba ni Cardinal Vidal nga tanang napatik sa Biblia matuman gyud kay mga pulong kana sa Ginoo, ug di nimo kalikayang di ta motuo sa Cardinal tungod kay usa siya sa labing himasa og Biblia.
Diha sa Biblia giingon nga kun natuman nga mamatay ang tawo, matuman usab nga may adlaw sa paghukom nga tanang butang sa langit ug sa yuta mangasunog, gawas sa tawo nga di mamatay kundi magpahayahay nga maglangoy-langoy sa linaw’ng kayo.
Ambot kaha unsaon nato pag-ikyas niini. Di ba?