Kini ang singgit karon sa kampo ni Ombudsman Merceditas Gutierrez. Hustisya human sa makabungog nga suporta pagpa-impeach kaniya sa komitiba sa hustisya sa ubos balay balaoranan. Karon, gitakda ang pagpasa ang reklamo ngadto sa plenaryo kung diin gipanlantaw nga mayoriya sa mga kongresista pabor sa pagpa-impeach sa ombudsman. Gitakdang mahimong impeachment court ang senado aron didto iladlad ang mga ebidensya pabor ug batok ni Gutierrez. Ang maong proseso dili na bag-o sa mga Pilipino tungod kay atong gitutokan ang nahimong impeachment proceedings kaniadto ni kanhi presidente Joseph Estrada.
Kangaroo court. Kini ang tawag ni Gutierrez sa mga kongresista nga nipabor sa pagpalagpot kaniya sa pwesto. Nakalimot siguro si Gutierrez nga gihimo ‘sab niyang kangaroo court ang ombudsman sa paspas nga pagbasura sa mga kaso kaniadto luyo sa lig-on nga ebidensya. Nakalimot si Gutierrez nga iya ‘sab nga giyak-an ang mga kaso sama sa NBN-ZTE deal, ang fertilizer scam ni Jokjok Bolante ug uban pang mga kaso sa kurapsyon batok sa administrasyong Arroyo. Di’ ba wa’ niya dungga ug hatagi og gibug-aton ‘sab ang maong mga pasangil tungod kay alang niya wa’y igong basehanan ang tanan?
Karon, nabalik ang tanan kang Gutierrez. Mahimong makaingon ‘ta nga gaba na ning tanan niya tungod sa wa’ paghatag og bili sa mga dagkong kaso sa miaging administrasyon nga naglambigit sa dagkong salapi. Karon, panahon na aron mabaslan siya sa iyang pagyaka sa maong mga kaso, panahon na aron makab-ot ang hustisya nga wa’ makuha atol sa miaging pamunoan. Di’ ‘sab tantong baga ang nawong ni Gutierrez nga nangayo og hustisya nga buot huna-hunaon hustisya ang iyang gihikaw sa mga tawo sukad pa sa iyang paglingkod sa katungdanan. Bakikaw paminawon nga ang tawo nga wa’ motimbang-timbang sa mga ebidensya ug modungog sa mga argumento mao na karon ang nangayo og hustisya.
Way plano si Gutierrez nga mag hara-kiri luyo sa mga akusasyon nga gibato sa iyaha karon. Apan dili hara-kiri ang angayan nga himuon sa pangu’ sa ombudsman apan ang pag-resign nalang sa katungdanan. Sa maong paagi mahatagan pa niya og dungog ang iyang pamilya nga maoy nagsuporta ug nituo kaniya karon. Apan kung barugan gyud niyang limpyo ang iyang konsensya sa mga pasangil nga gilabay batok niya, mas labing maayo aron masayod si Gutierrez sa unsa ang tukmang proseso sa pagkab-ot sa hustisya ug aron iyang makita ang mga ebidensya batok kaniya ug sa susamang higayon, iyang maladlad ang mga ebidensya ‘sab nga makapa-abswelto niya sa impeachment complaint.
Tan-awon nalang ni Gutierrez ang impeachment proceedings nga maoy makaluwas sa nagusbat na nga dungog sa Ombudsman. Sa nga’n sa mga tawo sa maong ahensya nga kinasing-kasing nga nagtrabaho ug matinud-anon sa ilang saad sa paghatag og hustisya sa mga opisyal ug trabahante sa gobyerno nga nalambigit sa mga kontrobersiya, dawaton nalang sa hingpit ni Gutierrez ang maong proseso aron mahatagan na intawon og bag-ong nawong ug mabangon ang dungog sa ombudsman nga nakaresolbar lang og mga gagmay nga kaso sa kurapsyon apan ang mga kaso sa mga dagkong politiko, ingon og gibutang nalang sa limot. Apan sa impeachment case karon ni Gutierrez, di’ mahimong mabutang sa limot ang hustisya nga dugay nang gipangayo sa mga Pilipino.
* * *
Email: rico_lucena@abs-cbn.com or ricolucena@yahoo.com